Балки 2022 йилнинг энг шов-шувли трансфери ёзги трансфер ойнаси анча олдин содир бўлгандир. Энди расман Эрлинг Холанд - "Манчестер Сити" футболчиси!
Тўрт йил давомида Европанинг деярли барча гранд клублари қизиқишига сабабчи бўлган Эрлинг Холанднинг трансфери "Ман Сити"га қанчага тушиши, норвегиялик футболчининг маоши ва келишув амалга ошишида ёрдамга келган учинчи шахслар қанча фойда кўрганини аниқлашга ҳаракат қиламиз.
Деярли барча "Реал" Холанд билан келишиб олгани, футболчининг отаси Мадриддан уй сотиб олганини муҳокама қилаётган бир вақтда "шаҳарликлар" норвегияликни ишонтириш учун барча усулларни қўллашди. Ва якунда булар ўз фойдасини берди десак муболаға бўлмайди.
Трансфер қандай содир бўлди?
Турли манбаларга кўра, "Манчестер Сити" вакиллари Дортмунднинг "Боруссия" клуби ҳужумчисининг манфаатларини ҳимоя қилган собиқ агент Мино Райоланинг олдига касалхонага ташриф буюришган. Бу келишувга эришишда асосий омил бўлиб хизмат қилган. Шунингдек, яқин кунларда ингилиз клуби билан амалдаги шартномасини 2025 йилгача узайтириши кутилаётган Хосеп Гвардиоланинг асосий шарти айнан Холандни сотиб олиш эди. Футболчининг ўзини ҳам испан мутахассиси билан ишлаш келишувнинг яна бири омили сифатида қаралмоқда.
Келишув "шаҳарликлар"га қанчага тушди?
Трансфер нархи бу келишувнинг энг қизиқарли ва ноаниқ қисмидир. The Telegraph хабарига кўра, "Манчестер Сити" Холандни сотиб олиш учун "асаларилар" қўйган товон пулини тўлашади. Шу билан бирга улар яна бир қанча қўшимча харажатларга ҳам дуч келишади. Улар қуйидагилар:
— 75 миллион евро Холанднинг товон пули
— 125 миллион евро - шартнома бонуси ва футболчининг 5 йиллик умумий маоши
— 50 миллион евро Холанднинг агентлари ва вакилларига қўшимча тўловлар.
Шу тариқа, "Ман Сити" футболчининг трансфери учун умумий миқдорда 250 миллион евродан ортиқ маблағ сарфлайдиган бўлди. Бу вазиятдан "Боруссия" бироз афсусланса арзийди. Чунки дортмундликлар сайёрамизнинг ҳозирги вақтдаги энг кучли 3 та марказий ҳужумчилари қаторига кирадиган Холанд трансферидан бор йўғи 75 миллион ишламоқда. Таққослаш учун, "Манчестер Юнайтед" Харри Магуайр учун "Лестер" ҳисоб рақамига 93,5 миллион евро ўтказиб берган бўлса, Жейдон Санчо манкунианликларга 80 миллионга тушган. Ха, айтганча, Санчо айнан "асаларилар" сафидан "МЮ" таркибига бориб қўшилган.
Шу ўринда қизиқарли савол туғилади. Асосий ўйин услуби майда паслар орқали рақибни "янчиб" ташлайдиган жамоада Холанд ўз ўрнини топа оладими? Гвардиола "терминатор"дан қандай фойдаланади? Буни келаси 2022/23 йилги мавсумда билиб оламиз.
