Ma’lumki, uy uchrashuvlari o‘tkaziladigan stadionda maydon yoki projektor bilan bog‘liq muammoga ega klublar mezbonlik maqomidagi o‘yinlarini O‘zPFL tomonidan qabul qilingan boshqa stadionlarda tashkil etib kelmoqda. 

Yaqindagina “Buxoro” sport majmuasidagi maydon hamda projektor bo‘yicha kamchiliklar bartaraf etilgani sabab “Buxoro” klubi o‘z uy arenasiga qaytgandi. Endi esa “Qizilqum” ham bu boradagi talablarni bajardi. Mavsum avvalidan buyon O‘zPFL ishchi guruhi Navoiydagi arenada chim bilan amalga oshirilgan ishlarni kuzatib bordi. 

“2022 yilgi mavsumda O‘zbekiston Professional futbol ligasi tomonidan o‘tkaziladigan musobaqalar reglamenti”ning 16.8-bandiga asosan mezbon jamoa Musobaqaning rasmiy kalendar uchrashuvi boshlangunga qadar 20 kundan kech bo‘lmagan muddatda o‘yin kuni, joyi va vaqti borasida taklif berishga haqli. “Qizilqum”ning mana shunday taklifi asosida O‘zPFL ishchi guruhi Navoiyda bo‘ldi va amalga oshirilgan ishlar bilan tanishdi. Maydondagi zararlangan maysalarni almashtirish ishlari yakuniga yetgan. Qolaversa, stadion yoritgichlarida ham sozlash ishlari olib borilgan. Ayni paytda “Yoshlar” sport majmuasi yoritish tizimi 2379 LUX’ni tashkil etmoqda. 

Shundan kelib chiqib, “Qizilqum” 10-tur doirasidagi “Surxon”ga qarshi uchrashuvdan boshlab o‘z uy o‘yinlarini Navoiy shahridagi “Yoshlar” sport majmuasida o‘tkazadi. “Qizilqum” — “Surxon” uchrashuvi 23 may, dushanba kuni soat 19:00 da boshlanadi.

Ma’lumot uchun. “Qizilqum” har ehtimolga qarshi butun bir mavsum davomida AGMK stadionidan foydalanish bo‘yicha xat bergandi. Stadion bilan bog‘liq muammolar ertaroq bartaraf etilgach, Reglament asosida klubga 10-turdan boshlab Navoiyga qaytishga ruxsat berildi. AGMK bilan o‘yin esa shu yilning 27 fevral kuni imzolangan ikki klub o‘rtasidagi kelishuv asosida o‘tkaziladi. Mazkur kelishuv shu yilning 13 may sanasidan boshlab o‘z kuchini yo‘qotadi.