"Nasaf" Osiyo chempionlar ligasi guruh bosqichini muvaffaqiyatli bosib o‘tib, pley-off bosqichi yo‘llanmasini qo‘lga kiritdi. OFK musobaqani kuz-bahor tizimiga o‘tkazayotgani bois, pley-off bosqichi o‘yinlari kelasi yilning fevral oyida o‘tkaziladi va u markazlashgan holda bo‘lib o‘tadi. Xo‘sh, markazlashgan musobaqani Qarshi shahrida o‘tkazishning imkoni bormi?

OFK Musobaqalarni o‘tkazish bo‘limi boshlig‘i, hamyurtimiz Avaz Berdiqulovning ma’lum qilishicha, markazlashgan tartibda o‘tkaziladigan 1/8, 1/4 va 1/2 final raundlariga mezbonlik qiladigan mamlakat ishtirokchi klublarga qarab tanlanadi. Jumladan, Qarshi shahri ham mezbonlik uchun ariza topshirishi mumkin, biroq fevral oyidagi ob-havo sharoitini nazarda tutsak, markazlashgan turnirning O‘zbekistonga berilishi ehtimoli juda kam.

Eslatma, finalgacha bo‘lgan raundlarda juftlik g‘olibi 1ta o‘yin vositasida aniqlanadi. Final esa 2ta uchrashuvdan iborat. Xullas, «Nasaf» finalga chiqish asnosida OCHL o‘yinini Qarshiga olib kelishi mumkin.

Eslatib o‘tamiz, "Nasaf" nimchorak final bosqichida Saudiya Arabistonining "Ash-SHabab" klubi bilan to‘qnash keladi. Musobaqaning chorak final va yarim finaliga esa qur’a tashlanadi.