"Насаф" Осиё чемпионлар лигаси гуруҳ босқичини муваффақиятли босиб ўтиб, плей-офф босқичи йўлланмасини қўлга киритди. ОФК мусобақани куз-баҳор тизимига ўтказаётгани боис, плей-офф босқичи ўйинлари келаси йилнинг февраль ойида ўтказилади ва у марказлашган ҳолда бўлиб ўтади. Хўш, марказлашган мусобақани Қарши шаҳрида ўтказишнинг имкони борми?

ОФК Мусобақаларни ўтказиш бўлими бошлиғи, ҳамюртимиз Аваз Бердиқуловнинг маълум қилишича, марказлашган тартибда ўтказиладиган 1/8, 1/4 ва 1/2 финал раундларига мезбонлик қиладиган мамлакат иштирокчи клубларга қараб танланади. Жумладан, Қарши шаҳри ҳам мезбонлик учун ариза топшириши мумкин, бироқ февраль ойидаги об-ҳаво шароитини назарда тутсак, марказлашган турнирнинг Ўзбекистонга берилиши эҳтимоли жуда кам.

Эслатма, финалгача бўлган раундларда жуфтлик ғолиби 1та ўйин воситасида аниқланади. Финал эса 2та учрашувдан иборат. Хуллас, «Насаф» финалга чиқиш асносида ОЧЛ ўйинини Қаршига олиб келиши мумкин.

Эслатиб ўтамиз, "Насаф" нимчорак финал босқичида Саудия Арабистонининг "Аш-Шабаб" клуби билан тўқнаш келади. Мусобақанинг чорак финал ва ярим финалига эса қуръа ташланади.