Superliganing 6-turidan o‘rin olgan "Lokomotiv" - "Surxon" uchrashuvi oxirida ikki jamoa a’zolari o‘rtasida ziddiyatli vaziyat kelib chiqqandi.

O‘sha vaziyatdan keyin "Lokomotiv" klubi shifokori Abror Pirriyev o‘zining telegramdagi kanalida quyidagi postni qoldirdi:

"Kecha tushlik mahali murabbiylar shtabi davrasida “Surxon” bilan kechgan o‘yindagi mojaro ortidan Kaxi Maxaradzening 2ta o‘yinga chetlatilgani-yu 5 mln jarimaga tortilgani; ustiga ustak klubimiz ham 15 mln jarima to‘laydigan bo‘lgani atrofida qizg‘in suhbat bo‘ldi:

– Yaqindagina “...” jamoalari o‘yinda to‘s-to‘polon qilishgandi. Biznikidan ancha jiddiy edi. Na futbolchiga, na jamoaga chora ko‘rilmadi-ku, – dedi murabbiylardan biri.

– Ko‘rilgandir, balki siz eshitmagandirsiz, – tinchlantirgan bo‘ldi boshqa bir murabbiy.

– Futbolchi jarimasini tushundim, jamoa nima sababdan? Yana sening maydoningda uy o‘yinlarini o‘tkazayotgan jamoa sabab jarimaga tortilsang alam qilarkan-da, – javradi boshqa biri.

Xullas, kun tartibiga jarimani “Surxon”dan undirib olish masalasi qo‘yiladigan bo‘p turibdi", - deb yozadi Abror Pirriyev o‘zining telegramdagi kanalida.