Суперлиганинг 6-туридан ўрин олган "Локомотив" - "Сурхон" учрашуви охирида икки жамоа аъзолари ўртасида зиддиятли вазият келиб чиққанди.
Ўша вазиятдан кейин "Локомотив" клуби шифокори Аброр Пирриев ўзининг телеграмдаги каналида қуйидаги постни қолдирди:
"Кеча тушлик маҳали мураббийлар штаби даврасида “Сурхон” билан кечган ўйиндаги можаро ортидан Кахи Махарадзенинг 2та ўйинга четлатилгани-ю 5 млн жаримага тортилгани; устига устак клубимиз ҳам 15 млн жарима тўлайдиган бўлгани атрофида қизғин суҳбат бўлди:
– Яқиндагина “...” жамоалари ўйинда тўс-тўполон қилишганди. Бизникидан анча жиддий эди. На футболчига, на жамоага чора кўрилмади-ку, – деди мураббийлардан бири.
– Кўрилгандир, балки сиз эшитмагандирсиз, – тинчлантирган бўлди бошқа бир мураббий.
– Футболчи жаримасини тушундим, жамоа нима сабабдан? Яна сенинг майдонингда уй ўйинларини ўтказаётган жамоа сабаб жаримага тортилсанг алам қиларкан-да, – жавради бошқа бири.
Хуллас, кун тартибига жаримани “Сурхон”дан ундириб олиш масаласи қўйиладиган бўп турибди", - деб ёзади Аброр Пирриев ўзининг телеграмдаги каналида.
