Gvardiola jamoasi vanihoyat o‘ziga kerak bo‘lgan hujum vakilini sotib oladigan bo‘ldi. "Manchester Siti" "BVB" bilan Erling Xoland xaridi borasida kelishuvga erishdi. 21 yoshli futbolchini nimalarga qodir ekanini yaxshi bilamiz. O‘tmishda "Molde", "Zalsburg" kabi klublarda to‘p surgan hujumchi, bugun dunyoning eng kuchli jamoalaridan biriga qo‘shiladi. Xoland "shaharliklar" bilan 5 yillik bitim tuzadi. Uning narxi esa 63 million funtni tashkil etdi. Quyida Gvardiola qo‘l-ostida porlagan yulduz hujumchilar haqida gap boradi.
Tyerri Anri
Anri 2007 yilda "Arsenal" muxlislari qalbini vayron etib, "Barselona"ga ketadi. Oradan ko‘p o‘tmay, u Gvardiola bilan ishlay boshlaydi. Fransuz futbolchisi La-ligadagi ilk mavsumida 26 ta gol urishga erishgan. U Kataloniyada 2009 yili trebl qayd eta olgan. Anri Pedro sabab zaxiraga mixlanib qoladi. Keyinchalik esa, 2010 yilda MLSga yo‘l oladi.
Samyuel Eto'o
Eto'o Gvardiola bilan faqat bir mavsum birga ishlagan. Ammo o‘sha bir mavsumda (2008-09) ajoyib rekord muallifiga aylangandi. Kamerunlik afsona Anri bilan trebl yutishda ham ishtirok etadi. U mavsum so‘ngida "Inter"ga ketadi. Uning o‘rniga esa Ibragimovich olib kelinadi. Gvardiola va Mourinyoning shogirdi bo‘lib ko‘rgan hujumchi, ular haqida shunday degan: "Men bu ikkisini solishtira olmayman. Negaki, ulardan biri "Bavariya" bilan YECHLni yuta olmagan. Boshqasi esa "Portu" bilan bu ishni eplagan".
Futbolchi nimaga sha’ma qilganini tushungan bo‘lsangiz kerak.
Robert Levandovski
Polshalik hujumchi 2014 yilda "Borussiya Dortmund"dan "Bavariya" safiga erkin agent sifatida yo‘l oladi. Levandovski Gvardiola bilan ikki mavsum birga bo‘lgan. So‘nggi, 2015-16 yilda esa, Bundesligada 30 ta gol urishga erishadi. Pep Levandovskiga ta’rif berar ekan, uni o‘z faoliyatida uchratgan eng professional hujumchi deb ataydi.
Serxio Aguero
Aguero APLdagi eng ajoyib markaziy hujumchilardan biri edi. U Gvardiola qo‘l-ostida Tyerri Anrini gollar borasida ortda qoldirgan edi (184 ta gol). To‘g‘ri, oxirgi paytlarda Gvardiola Agueroni qadriga yetarlicha yetmadi. Vaqt o‘tgach esa u "Barselona"ga yo‘l olib, u yerda faoliyatini tugatishga majbur bo‘ldi.
Gvardiola Serxioning 2011-2012 yilgi mavsumda, 38 turda "QPR"ga urgan golini eslar ekan, jumladan shunday degan: "Uni Angliyada bajargan ishining ko‘lami bemisildir. Bu jamoa bilan Aguero haqiqiy tarixni yoza oldi. Shu sabab uning har bir goli muxlislar qalbida yashaydi".
ISMATOV J
