Gresiyaning Iraklion shahrida o‘tgan og‘ir atletika bo‘yicha yoshlar o‘rtasidagi jahon chempionatida yurtimiz sharafini munosib himoya qilgan terma jamoamiz Vatanimizga qaytib keldi. Sportchi va murabbiylarimiz Islom Karimov nomidagi Toshkent xalqaro aeroportida tantanali kutib olindi.
Tadbirda Shahrullo Mahmudov boshchiligidagi Sportni rivojlantirish vazirligi hamda O‘zbekiston og‘ir atletika federasiyasi xodimlari, sportchi va murabbiylarimizning yaqinlari ishtirok etishdi. Mutasaddilar musobaqa qahramonlarini kutib olishar ekan, ular qayd etgan natija yoshlarimiz orasida ushbu sportning yanada ommalashishi yo‘lida xizmat qilishini alohida ta’kidlashdi.
Eslatib o‘tamiz, 2-10 may kunlari o‘tgan musobaqada 6 nafar sportchi bilan qatnashgan terma jamoamiz 5 ta oltin, 5 ta kumush va 2 ta bronza medallarini jamg‘arib, umumjamoa hisobida 62 mamlakat orasida uchinchi o‘rinni qo‘lga kiritgan.
