«Yuventus» himoyachisi Jorjio Kyellini mavsum oxirida faoliyatini yakunlashini ma’lum qildi.

"So‘nggi 10 yil ajoyib o‘tdi, endi yigitlar boshlangan ishni davom ettirishi lozim. Men qo‘limdan kelganini qildim, ortimda nimadir qoldiryapman, deb o‘ylayman.

Dushanba kuni stadion bilan xayrlashaman, shundan keyin agar kuchim yetsa, Florensiyada oxirgi marta maydonga tushaman.

Bu yuz foiz o‘zimning tanlovim, faoliyatimni yuqori darajada yakunlayotganimdan xursandman. Ko‘p yillardan beri avvalgi saviyamda o‘ynay olmay qolganimda butsini mixga ilishni xohlamasligimni ta’kidlab kelardim.

Jamoa uchun bor kuchimni sarfladim va yaqinda «Yuventus»ning sodiq muxlislaridan biriga aylanaman. Klubdagi shuncha yillardan so‘ng o‘z his-tuyg‘ularingizdan xalos bo‘lishingiz qiyin", — dedi Jorjio Kyellini.

37 yoshli italiyalik himoyachi jamoa bilan 9 marta Italiya chempionligini qo‘lga kiritgan va bir marta ikkinchi divizionda g‘olib chiqqan. Shuningdek, 5 martadan Italiya Kubogi va Superkubogida zafar quchgan.