O‘tgan so‘nggi 10 yil davomida dunyodagi eng ko‘p maosh oluvchi to‘rtta sportchining uchtasi futbolchilar edi. Ular ichida esa Ronaldu va Messi ham bor. 2022 yilga kelib, "Forbes" agentligi ma’lumotlariga ko‘ra, Messi Ronaldu va Neymarni yuqori ish haqi borasida quvib o‘tdi. Argentinalik futbol afsonasining yillik ish haqi 130 million dollarga yetgan. Ronalduda esa bu ko‘rsatkich 115 millionni, Neymarniki 95 million dollarni tashkil etadi.
O‘tgan yilning avgust oyida "Barselona"dan "PSJ" safiga yo‘l olgan Messi, umumiy maoshining 58 foizini aynan maydondagi harakatlar sabab ishlaydi. "Forbes" Messining 42 foiz mablag‘i turli xil qo‘shimcha sovrin jamg‘armalari va bonuslardan kelishini aytib o‘tgan. Yetti bora "Oltin to‘p" sohibi, 55 million dollarni "Pepsi", "Adidas" hamda "Budweiser" kabi yirik brendlar bilan hamkorlikdan ishlaydi.
Uning eng katta raqibi bo‘lgan Ronaldu ham yozda ko‘chishni amalga oshirgandi. Uning manzili yana "MYU" tomonlarga tushdi. Krishtianu o‘z faoliyati davomida 1 millard dollardan ko‘p mablag‘ga ega bo‘lgan dunyodagi ilk futbolchiga aylangandi. Portugaliyalik ham 55 million dollarni hamkorlik bitimlaridan – "Nike" hamda "Clear Shampoo" reklamasidan ishlagan.
Ronaldu ijtimoiy tarmoqlarda ham faol. Uning barcha medialardagi kuzatuvchilari soni jami 690 million kishini tashkil etadi. Shu sabab, birgina Instagram'ga qo‘ygan posti uchun katta mablag‘ga ega chiqadi.
Neymar "Forbes"ning jadvalida to‘rtinchi o‘rinni egallaydi. U ham Messi kabi "PSJ" vakili sanaladi. Braziliya terma jamoasi a’zosi maydonda yiliga 70 million, undan tashqarida 25 million dollar ishlab topadi. U dunyo futbol tarixidagi eng qimmat transfer bo‘lgandi. Neymarning ko‘chish narxi 263 million dollarga baholangan. Hujumchi Fransiya chempionligini to‘rt marta qo‘lga kiritgan bo‘lsa ham, Parijning eng asosiy maqsadi – YECHL g‘olibligiga yeta olganicha yo‘q.
Shuningdek, "Forbes"ning kuchli o‘nligidan Lebron Jeyms, Stefen Karri, Kevin Dyurant kabi mashhur sportchilar joy olgan. Quyida ularning ro‘yxati taqdim etilgan.
2022 yilning top-10 taligi:
1. Lionel Messi – 130 million dollar
2. Lebron Jeyms – 121,2 million dollar
3. Krishtianu Ronaldu – 115 million dollar
4. Neymar – 95 million dollar
5. Stefan Karri – 92,8 million dollar
6. Kevin Dyurant – 92,1 million dollar
7. Rojer Federer – 90,7 million dollar
8. Kanselo Alvares – 90 million dollar
9. Tom Bredi – 83,9 million dollar
10. Yannis Adetokunbo – 80,9 million dollar.
ISMATOV J.
