Superliganing 9-turidan o‘rin olgan AGMK – “Bunyodkor” (0:0) uchrashuvidan keyin “qaldirg‘ochlar” ustozi Viktor Karpenko o‘z fikrlari bilan o‘rtoqlashdi.
Bugun Olmaliqda futbol o‘ynash uchun qulay ob-havo hukmronlik qildi. Juda og‘ir o‘yin o‘tkazdik. Futbolda harakat qilmasdan natijaga erishish qiyin. Uchrashuv davomida har ikkala jamoada ko‘plab vaziyatlar yuzaga keldi. Ochig‘ini aytaman, bugun biz ko‘rsatgan o‘yin menga yoqdi. Yigitlar juda yaxshi o‘yin namoyish etib berishdi. Natija uchun intilish, kurashish bu juda yaxshi holat. Rahbariyat bizga kurashuvchan xarakterga ega jamoa shakllantirish vazifasini qo‘ygan. Muxlislar esa futbolning jozibadorligini yanada oshiradi deb o‘ylayman. Suhrob Sultonov va Umarali Rahmonaliyev maydonga tushmagani jamoamiz uchun yo‘qotish hisoblanadi. Tarkibni kim o‘yinga to‘liq tayyor ekanligidan kelib chiqib tanladim. Har bir futbolchining maydondagi vazifasi haqida alohida tushuntirishlar olib bordik.
