Tez orada taekvondo olamida Gran-pri seriyasiga kiruvchi nufuzli musobaqalar start oladi. Ushbu turnirlarda Olimpiada reytingida yuqori o‘rinda joylashgan sportchilargina ishtirok etishlari mumkin. Boisi, mazkur tasnifdagi vazn toifalari Olimpiya o‘yinlaridagi kabi shakllantirilgan va 4 yillikning eng nufuzli musobaqasiga qimmatli reyting ochkolarini taqdim qiladi.

O‘zbekiston taekvondo assosiasiyasi mutasaddilari, murabbiylar shtabi puxta tuzilgan reja asosida yil avvalida xalqaro musobaqalar orqali taekvondochilarimizga maksimal darajada reyting ochko ishlab olish imkoniyatini taqdim qilishdi. Bundan unumli foydalanib, shohsupaga ko‘tarilgan hamyurtlarimiz Gran-prida qatnashish mumkin bo‘lgan hududga kira oldilar. Keling, shu o‘rinda taekvondochilarimizning Olimpiada reytingdagi o‘rniga bir nazar tashlaymiz. Bunda Gran-pri musobaqalarida qatnashishi mumkin bo‘lgan sportchilarimizning o‘rnini ko‘rsatib o‘tamiz.

-68 kg:
1. Bredli Sinden (Buyuk Britaniya) – 274.14
2. Ulug‘bek Rashitov (O‘zbekiston) – 220.04 …
35. Niyaz Pulatov (O‘zbekiston) – 68.53

-80 kg:
1. Maksim Xramsov (Rossiya) – 337.51 ...
6. Nikita Rafalovich (O‘zbekiston) – 166.99 ...
18. Shuhrat Salayev (O‘zbekiston) – 85.31

+80 kg:
1. Vladislav Larin (Rossiya) – 352.96 ...
44. Shohruh Rajabov (O‘zbekiston) – 46.56

-57 kg:
1. Anastasiya Zolotich (AQSH) – 316.70 ...
13. Charos Qayumova (O‘zbekiston) – 125.53

-67 kg:
1. Mateya Yelichich (Xorvatiya) – 335.26 ...
14. Feruza Sodiqova (O‘zbekiston) – 127.71

+67 kg:
1. Byanka Uolkden (Buyuk Britaniya) – 344.76 ...
10. Svetlana Osipova (O‘zbekiston) – 130.10

Ko‘rib turganingizdek, Gran-pri turnirlarida sakkiz nafar vakilimiz ishtirok etishi mumkin. O‘zbekiston taekvondo assosiasiyasining ma’lum qilishicha, terma jamoamiz ilk bor bunday katta tarkibda dunyoning eng sara taekvondochilari bilan raqobat qilishga tayyorlanmoqda. Bu mavsumdagi musobaqalar 3-5 iyun kunlari Rim, 2-4 sentyabr sanasida Parij va 21-23 oktyabrda Manchester shaharlarida o‘tkaziladi.