Angliya chempionati tugashiga bir tur qoldi. Tunda "Liverpul" "Sautgempton" bilan o‘yinda juda qiynalib bo‘lsa ham 3 ochko oldi. Dastlab 13-daqiqada Redmond gol urdi. "Liverpul" Minamino (27-daqiqa) va Matip (67-daqiqa) gollari bilan javob qaytardi. "
"Liverpul" oxirgi g‘alabalarini faqat bitta gol farqi bilan qo‘lga kiritmoqda. Azob bilan, kambekchalar bilan. "Liverpul"ning titulga intilishida bir drama bor. Hozir "Siti" bilan 1 ochko farq. Oxirgi turda manchesterliklar Stiven Jerrard boshqaruvidagi "Aston Villa" bilan o‘ynaydi. Ya’ni, "Liverpul"ning eng katta afsonasi boshqa jamoa bilan bo‘lsa ham chempionlikni sovg‘a qilishi mumkin. Agar "Manchester Siti"dan ochko olsa. "Villa" tarkibida ham bir necha sobiq mersesayd bor. Bu yoqimli ertakka aylanishi mumkin.
Ammo. Bu tarafda. Haqiqiy sovuqqon killerlar. "Manchester Siti". Durangni hisoblamasa, beshta uchrashuvda yirik g‘alabalar va 22 ta gol urgan. Aynan oxirgi turlarda to‘plar nisbatini o‘z foydasiga o‘zgartirgan. Raqobatchisidan farqli ravishda bor kuch-qurolini APL tituli uchun tashlagan. Tarkibda muammo yo‘q, aniqrog‘i bor, raqib uchun muammo. Bu Pep Gvardiola barpo etgan tank. Ular shunchaki o‘zidan darajasi pastroq raqibni oxirgi uchrashuvda yo‘q qilib tashlab, chempion bo‘lishi ko‘proq reallikka o‘xshaydi.
Ana endi tanlov, qaysi variantni ko‘ramiz, ertak yo reallik? Nima bo‘lganda ham bu buyuk qarama-qarshilik. Xosep Gvardiola va Yurgen Klopp shubhasiz zamonamizning eng katta murabbiylar duelini yuzaga keltirishdi. Hatto futbolchilar o‘rtasida bunday raqobat deyarli qolmadi. APLning oxirgi dramatik turida chempionlik o‘yinlari:
38-tur. 22 may. 20:00
"Liverpul" - "Vulverhempton"
"Manchester Siti" - "Aston Villa"
Davron Fayziyev.
