Uch kun avval O‘zbekiston futbol assosiasiyasi Superliga futbol klublariga xat yo‘llab, O‘zbekiston U-23 termasiga jalb etilgan futbolchilar nomini oshkor qildi. Ma’lum bo‘ldiki, Temur Kapadze jamoasida “Paxtakor”ning to‘rt hamda “Nasaf”ning uch nafar futbolchisi bor. 

Terma yig‘ini 20 may sanasidan start olishi ko‘rsatib o‘tilgan. Biroq bu vaqtdan boshlab to qit’a chempionati startiga qadar Superliga klublari yana ikki turda maydonga tushishlari avvaldan begilab qo‘yilgandi. Umuman olganda taqvim O‘FA taqdim etgan ishchi reja asosida ishlab chiqilgan. Shu reja asosida avvaldan “Olimpik” futbol klubining ikki uchrashuvi Osiyo chempionatidan keyinga qoldirilgan. 

Reglamentga ko‘ra esa milliy va olimpiya terma jamoasiga uch va undan ortiq futbolchisini yuborayotgan futbol klublari tur o‘yinini qoldirishni so‘rab murojaat qilishga haqli. Shundan kelib chiqib, “Nasaf” va “Paxtakor” klublarining o‘yinlarini tashkil qilish masalasi yana so‘roq ostida qoldi.  

O‘zbekiston Professional futbol ligasi klublar bilan o‘zaro kelishgan holda terma bosh murabbiyiga taklif bilan chiqdi hamda ikki kundan keyin start olishi kutilayotgan 10-tur uchrashuvlarini saqlab qoldi. Kapadze “Nasaf” mazkur turda Xusain Norchayev xizmatidan, “Paxtakor” esa Hojimat Erkinov hamda Abbos Fayzullayev xizmatidan foydalanishiga rozi bo‘ldi. 

Biroq bu futbolchilar 11-turda baribir o‘z klublariga yordam bera olmaydi. Ma’lum bo‘lishicha, yaqin kunlar ichida U-23 terma jamoasi qit’a chempionati oldidan o‘rtoqlik o‘yinida maydonga tushadi.  

Shundan kelib chiqib, Coca-cola Superliga 11-turidan o‘rin olgan qolgan uchrashuvlar o‘z vaqtida bo‘lib o‘tadi. “Dinamo” — “Nasaf” hamda “So‘g‘diyona” — “Paxtakor” uchrashuvlarining yangi sanalari esa keyinroq e’lon qilinadi.

O‘zbekiston Professional futbol ligasi olimpiya terma jamoasining keyingi rejalariga to‘la oydinlik kiritilmaguniga qadar tanaffusdan keyingi uchrashuvlar sanalarini e’lon qilishga shoshilmaydi.