Fransiya klublari azaldan Yevropa maydonlarida munosib raqobatlashishi bilan ajralib turadi. Har holda, mamlakat jamoalari tarixda 13 marta yevrokuboklar finaliga chiqqan. Bu qit’a reytingining 5-o‘rnida tilga olinadigan liga uchun chakki natija emas. Biroq shunisi borki, fransiyaliklar hozirga qadar Yevropa sahnasida atigi 2 marta g‘alaba nashidasini surishgan, xolos.
Liga 1 hozir ham Yevropaning kuchli 5ta chempionati qatorida. Biroq Fransiya hisobida yevrokuboklardagi g‘alabalar soni deylik, reyting bo‘yicha pastda turadigan Niderlandiya, Belgiya va Portugaliyanikidan kam. Buning sababi - omadsiz finallar ko‘pligi.
Fransiya futboliga 2ta yevrokubokni «Marsel» va «PSJ» taqdim etgan. Marselliklar 1993 yili «Milan»ni yengish asnosida asosiy yevroturnirda zafar quchishgan. Parij klubi esa shundan 3 yil o‘tib, Kubok egalari kubogi finalida Avstriyaning «Rapid» jamoasini yenggandi. Yangi asrga qarasak, Liga 1 vakillari 4 marta hal qiluvchi o‘yinga chiqishdi, biroq natija yo‘q. Jumladan, «Monako» va «PSJ» CHL finalida omadsizlikka uchradi. Yangi asrda kuzatilgan yana 2ta mag‘lubiyatli final esa «Marsel» zimmasida, faqat ikkinchi darajali turnirda.
Fransiya klublarining yevrokuboklar tarixidagi finallari
CHK|CHLda
«Reysm» - 2ta (1956 va 1959 yillar) - har ikkisida «Real»dan mag‘lubiyat
«Sent-Etyen» (1976 yil) - «Bavariya»dan mag‘lubiyat
«Marsel» (1991 va 1993 yillar) - «Srvena Zvezda»dan mag‘lubiyat, «Milan» ustidan g‘alaba
«Monako» (2004 yil) - «Portu»dan mag‘lubiyat
«PSJ» (2020) - «Bavariya»dan mag‘lubiyat
KEK va UYEFA|ELda
«Bastiya» (1978 yil) - PSVdan mag‘lubiyat
«Monako» (1992 yil) - «Verder»dan mag‘lubiyat
«PSJ» (1996 yil*) - «Rapid» ustidan g‘alaba
«Bordo» (1996 yil*) - «Bavariya»dan mag‘lubiyat
«PSJ» (1997 yil) - «Barselona»dan mag‘lubiyat
«Marsel» (1999 yil) - «Parma»dan mag‘lubiyat
«Marsel» (2004 yil) - «Valensiya»dan mag‘lubiyat
«Marsel» (2018 yil) - «Atletiko»dan mag‘lubiyat
A.ABDUVALIXO‘JAYEV tayyorladi
