17 yoshgacha bo‘lgan futbolchilar o‘rtasidagi Osiyo chempionatiga 2023 yilda Bahraynda bo‘lib o‘tsa, turnirning final bosqichi yo‘llanmasi uchun saralash bahslari oktyabr oyi boshida o‘tkaziladi. Bugun OFK qarorgohi joylashgan Kuala Lumpur shahrida saralash bosqichiga qur’a tashlandi. Qur’ani vatandoshimiz Avaz Berdiqulov o‘tkazdi.

Saralash bosqichi bu safar Sharq va G‘arb mintaqalariga ajratilmadi. Qur’adan avval 3-savatchadan o‘rin olgan O‘zbekiston "J" guruhiga joylashdi. O‘smirlarimizga Janubiy Koreya, Bruney va Shri-Lanka raqib bo‘ladigan bo‘ldi. Saralash bosqichi o‘yinlar 5, 7 va 9 oktyabr kunlari Toshkentdagi "Jar" stadionida bo‘lib o‘tadi.

10ta guruh g‘olibi va 2-o‘rinni egallagan jamoalar orasida 5ta eng yaxshi natijaga ega bo‘lgan jamoa Bahrayn maydonlarida o‘tadigan turnirga tashrif buyuradi. Ikkinchi o‘rinni egallaganlar reytingini tuzishda "A", "B", "S" va "D" guruhlarida 5-o‘rinni egallagan jamoaning boshqa termalar bilan natijasi chiqarib tashlanadi. "S" guruhi esa haqiqiy o‘lim guruhiga aylandi: Ummon, Iroq, Qatar, Livan va Bahrayn.

Osiyo chempionati final bosqichida yuqori 4ta o‘rinni egallagan jamoalar 2023 yilning kuz faslida Peruda o‘tkaziladigan Jahon chempionatida ishtirok etish huquqini qo‘lga kiritadi.

AFC U17 chempionati saralash bosqichi qur’asi natijasi:

"A" guruhi: Yaponiya, Iordaniya, Suriya, Filippin, Turkmaniston
"B" guruhi: Indoneziya, Malayziya, Falastin, Guam, Birlashgan Arab Amirliklari
"S" guruhi: Ummon, Iroq, Qatar, Livan, Bahrayn
"D" guruhi: Hindiston, Saudiya Arabistoni, Myanmar, Maldiv orollari, Kuvayt
"E" guruhi: Yaman, Bangladesh, Singapur, Butan
"F" guruhi: Tailand, Vyetnam, Xitoy Taypeyi, Nepal
"G" guruhi: Avstraliya, Xitoy, Komboja, Shimoliy Mariana orollari
"H" guruhi: Tojikiston, Afg‘oniston, Sharqiy Timor, Mo‘g‘uliston
"I" guruhi: Eron, Gonkong, Qirg‘iziston, Laos
"J" guruhi: Janubiy Koreya, Bruney Dorussalom, O‘zbekiston, Shri Lanka