Ha, «Liverpul»da o‘ynayotgan portugaliyalik hujumchi/yarim himoyachi Diogu Jotaning asl familiyasi boshqacha. U o‘z ism-sharifiga J harfini shunchaki, ko‘plab Silvalardan ajralib turish uchun qo‘shib olgan.
Bilim inson hayotini butunlay o‘zgartirib yuborishi - ayni haqiqat. «Liverpul» safiga qo‘shilishi bilan Yurgen Klopp ishonchini qozongan va qozonayotgan portugaliyalik Diogu Jota aslida Jota emas. Allaqachon barchaning tiliga ham, qulog‘iga ham birdek tanish «brend»ga aylangan Jota shunchaki, taxallus. Futbolchiga bu ibora J harfining portugal tilidagi talaffuz xususiyati va o‘zi Silvalar qatorida ajralib turishni xohlagani tufayli «yopishgan». Deylik, portugaliyalik hujumchi Chempionshipda «Vulverxempton» sharafini orqasiga Silva yozuvi tushirilgan futbolkada himoya qilgan. Chunonchi, uning to‘liq ism-sharifi - Diogu Xose Teysheyra da Silva.
Qiziq, unda «Jota» qachon va qanday paydo bo‘lgan? Gap shundaki, Silva - Portugaliyada eng keng tarqalgan familiya. Xususan, Diogu tahsil olgan mahalliy «Pasush» akademiyasida ham o‘sha vaqt juda ko‘p Silvalar to‘planishgandi. Xullas, «Liverpul»ning bo‘lajak yarim himoyachisi|hujumchisi boshqalardan ajralib turishni xohlab, o‘zini o‘zgacha talqinda tanishtiradi - Diogu J. Aytgancha, uning ukasi Andre ham futbolchi. Farqi shuki, Andre asl familiyasini saqlab qolgan Yo‘q, «RB Leypsig»da yetarlicha gol urayotgan Andre Silva boshqa - Dioguning ukasi ayni payt «Gondomar» klubida o‘ynamoqda. Qolaversa, futbolchi boshida Jota familiyasini olishni o‘ylamagan ham. U shunchaki, orqasida J harfi yozilgan formada to‘p sura boshlagan. Keyinchalik hamma Dioguga Jota iborasini «yopishtirgan». Gap shundaki, portugal alifbosidagi J harfining talaffuzi - Jota. Portugaliya alifbosida ham J qattiq harflar guruhiga kiradi aynan «J» sifatida talqin qilinadi. Ispan tilida esa bu o‘qilishi bo‘yicha «X» hisoblanadi. Bunga misol: «Alaves» tarbiyalanuvchisi Xota Peleteyro (APLda «Aston Villa» libosida ko‘rinish bergan futbolchi).
Dioguga qaytsak, u «Vulverxempton»ning Chempionshipdagi o‘yinlarida ham Silva familiyasi bilan harakatlangan. Chunonchi, liga qoidalariga muvofiq, futbolchilar libosiga ularning haqiqiy ism-shariflari bitilishi shart. 2018 yili «bo‘rilar» APLga ko‘tarilishdi va Diogu yana sevimli J harfini libosi orqasiga qaytardi. «Vulvz» safidagi mazmunli o‘yinlar esa portugaliyalikka «Liverpul» eshigini ochdi. Asosiysi, Jota «qizillar» o‘yiniga hech qanday muammosiz qo‘shilib, bir urinishda gollar «terish»ga tushdi va Jota familiyasi bilan keng tanildi.
APL Silva familiyasiga ega ajoyib futbolchilar ko‘p: Bernardudan tortib, Tyagugacha. Lekin Jota - yagona!
