Esingizda bo‘lsa 2018 yil aynan 26 may kuni Yevropa Chempionlar ligasi finali bo‘lib o‘tgandi. Unda «Real» hamda «Liverpul» jamoalari to‘qnash kelgan. Yakun esa madridliklarning 3-1 hisobidagi yirik g‘alabasi bilan tugagan. Quyida bundan 4 yil ilgari finalda ishtirok etgan (boshlang‘ich tarkibda maydonga tushgan) futbolchilarning ayni damdagi manzillari haqida so‘z yuritiladi.
1. «Real» (4-3-3)
Keylor Navas (darvozabon) – «Real»da muxlislar yoqimtoyi bo‘lgan futbolchi. U tez orada Kurtua tomonidan almashtirilgan va «PSJ»ga yo‘l olgan. Ayni damda esa Parijda Donarrumma soyasida qolmoqda.
Dani Karvaxal (chap qanot) – 30 yoshli futbolchi o‘z tengqurlari ichida eng yaxshilardan biri. Ayni damda ham u «Real» bilan birga.
Varan (markaziy) – amaldagi jahon chempioni 10 yillik xizmatidan keyin jamoani tark etdi. U 2021 yilda «MYU»ga yo‘l olgandi.
Serxio Ramos (markaziy) – «Real» tarixidagi eng yaxshi himoyachi. U Ispaniyada hamma sovrinlarga ega chiqqan. Ramos o‘tgan yozdan beri «PSJ» bilan birga.
Marselo (chap qanot) – hozirga qadar klub bilan birga. Ammo Marselo yozda ketishini ma’lum qilgan. Keyingi manzil esa aniq emas.
Modrich (yarim himoyachi) – o‘z o‘rnida dunyoning eng yaxshisi. 36 yoshli xorvat «Real»da qolmoqchi va shu yerda hammasiga yakun yasaydi.
Kazemiro (yarim himoyachi) – hali ham katta hajmga ega. U «Real»ning muhim vakili bo‘lib qolmoqda.
Kroos (yarim himoya) – u ham sheriklari kabi: muhim va muqim...
Isko (o‘ng qanot) – uning davri o‘tib bormoqda. Bir paytlar olamga sig‘magan futbolchi, bugun «Real»dan ketmoqda.
Benzema (hujumchi) – hozirda dunyoning eng yaxshi futbolchisi va hujumchisi. Bugun butun jamoa unga ishonib turibdi.
Ronaldu (chap qanot) – kimligini yaxshi bilasiz. U o‘sha finaldan keyin jamoani tark etadi. «Yuventus»dan keyin, Ronalduning manzili yana Angliya tomonlarga tushdi.
2. «Liverpul» (4-3-3)
Loris Karius (darvozabon) – 2018 yilgi finalning antiqahramoni. Shundan keyin u «Beshiktosh» hamda «Berlin» klublarida harakat qildi.
Aleksander-Arnold (o‘ng qanot) – eng yosh va iqtidorli futbolchi. Harxolda, 2018 yilda Trent shunday edi. Ayni damda 23 yosh bo‘lgan futbolchi darajasini saqlab kelmoqda.
Lovren (markaziy) – u 6 yil mersisaydliklarga xizmat qildi. Keyin esa «Zenit»ga sotib yuborilgan edi.
Van Deyk (markaziy) – dunyoning eng yaxshi markaziy himoyachilaridan biri. U «Liverpul»da hali ham yetakchi sanaladi.
Robertson (chap qanot) – u ham hali-hamon shu jamoada qolmoqda. Robbo Kloppning eng barqaror va ishongan futbolchilaridan biridir.
Xenderson (yarim himoyachi) – jamoaning haqiqiy sardori. U yaqin yillarda YECHL, APL, AFL hamda Angliya kubogini qo‘lga kiritdi.
Viynaldum (yarim himoyachi) – u 2021 yilda ketdi. O‘tgan yozda «PSJ»ga yo‘l olgan qahramonimiz, bu yozda yana ko‘chish niyatida.
Jeyms Milner (yarim himoyachi) – 36 yoshli faxriy futbolchi. U ham «Liverpul»da qolmoqda. Ammo kam foydalaniladi. Kezi kelganda jamoaga yordam berib turadi, xolos.
Muhammad Saloh (o‘ng qanot) – 2018 yilgi finalning eng baxti qaro vakili. Chunki Saloh o‘yin boshlanganidan keyin bir necha daqiqa o‘tgach, jarohat olgan. U kelayotgan bahsda barchasi uchun «qasos» olmoqchi.
Firmino (hujumchi) – endi sevimli bo‘lmay qolgan futbolchi. Chunki braziliyalik ortiq asosiy tarkib vakil emas. Shu sabab zaxirada o‘z imkonini poylashga majbur bo‘lmoqda.
Sadio Mane (chap qanot) – senegallik qahramon. U ham «Liverpul» uchun ko‘p yordam berib kelmoqda. Ammo Manening bitimi yakuniga yetishga yaqin turibdi.
ISMATOV J.
