“Andijon” – “Zomin” (2:1) uchrashuvidan keyingi o‘tkazilgan matbuot anjumanining ikkinchi qismida jamoamiz bosh murabbiyi Viktor Kumikov qatnashdi.

-  O‘zingiz ko‘rdingiz, shiddatli o‘yin bo‘ldi. Bunday jamoalar bilan o‘ynash doim bizga og‘ir bo‘ladi. Ularda ruhiy tomondan hech qanaqa bosim yo‘q. Bizga esa g‘alaba zarur. Ularda bosim yo‘qligi uchun hujumlari xavfliroq chiqdi. Bizda aksincha. Biroz asabiy uchrashuv bo‘ldi. Raqibda bir yarim taym davomida bittagina zarba bo‘ldi. O‘zimiz xato qildik va gol o‘tkazdik. Asosiysi, g‘alaba qozondik. Bundan keyin ham oldinga intilamiz. Keyingi o‘yin ham oson bo‘lmaydi. Chunki navbatdagi raqib “Yangiyer”.

-  To‘g‘ri, “Andijon” yutdi. Ammo g‘alabadan hamma ham xursand emas. Bilamizki, sizni taktikangiz asosan qanotlardan to‘p uzatilishi orqali amalga oshadi. Bir xil taktikadan foydalanilyapti...

-  Boshqa murabbiy va futbolchilarni olib kelinglar! Yaxshi o‘yinchilarni sotib olinglar, xohlasanglar “Barselona”ga o‘xshab o‘ynanglar. Mening uslubim esa shunaqa. Yaxshi o‘ynasang ham ba’zi odamlar bor, ularga yoqmaydi. 99 foiz hamma xursand. Muxlislarni, futbolchilarni ko‘ring, barcha quvondi. Hamma qarsak chalyapti...

-  Bugun negadir asosiy himoyachilar - Ildar Mamatkazin bilan Vladimir Bubanyaning o‘yini unchalik qovushmadi. Bunga nima deysiz?

-  To‘g‘ri, Ildarni birgina xatosi bo‘ldi. Ammo biz 20 ta imkoniyat yaratdik. Har doim shunaqa, hatto 10:0 ga yutsak ham gapirishadi. Axir inson bunday bo‘lmaydi. Agar rahbariyat meni ishimdan qoniqmasa, arizamni yozishim mumkin. “Andijon” doim “Barselona” singari o‘ynganmi? Siz shunday o‘ylaysizmi? Xuddiki, men kelib jamoaning o‘yini o‘xshamay qolgandek...