"Bavariya" "Liverpul" hujumchisi Sadio Manening transferi bo‘yicha muzokaralarni faollashtirdi, deb yozadi jurnalist Fabrisio Romano.

Myunxen klubi 30 yoshli senegallik "qizillar" lagerini tark etishga qaror qilgani haqida ma’lumot oldi.

Biroq transfer bo‘yicha muzokaralar haligacha davom etmoqda, chunki Sadio bor e’tiborini Chempionlar ligasi finaliga qaratgan edi.

Oldinroq Maneni inglizlar jamoasidagi maoshi qoniqtirmayotgani, ya’ni soliqlarsiz yiliga 12 million yevroni tashkil qilayotgani haqida xabar berilgandi.

Sadio o‘tgan mavsumda "qizillar" safida barcha turnirlarda 51 ta o‘yinda maydonga tushib, 23 ta gol urdi va 5 ta golga assistentlik qildi.

Hujumchining mersisaydliklar bilan shartnomasi 2023 yilning iyunida yakuniga yetadi. Transfermarkt Maneni 80 million yevroga baholagan.