"Бавария" "Ливерпуль" ҳужумчиси Садио Маненинг трансфери бўйича музокараларни фаоллаштирди, деб ёзади журналист Фабрицио Романо.
Мюнхен клуби 30 ёшли сенегаллик "қизиллар" лагерини тарк этишга қарор қилгани ҳақида маълумот олди.
Бироқ трансфер бўйича музокаралар ҳалигача давом этмоқда, чунки Садио бор эътиборини Чемпионлар лигаси финалига қаратган эди.
Олдинроқ Манени инглизлар жамоасидаги маоши қониқтирмаётгани, яъни солиқларсиз йилига 12 миллион еврони ташкил қилаётгани ҳақида хабар берилганди.
Садио ўтган мавсумда "қизиллар" сафида барча турнирларда 51 та ўйинда майдонга тушиб, 23 та гол урди ва 5 та голга ассистентлик қилди.
Ҳужумчининг мерсисайдликлар билан шартномаси 2023 йилнинг июнида якунига етади. Transfermarkt Манени 80 миллион еврога баҳолаган.