Futbol bo‘yicha U-23 Osiyo chempionati "A" guruhidan o‘rin olgan O‘zbekiston va Turkmaniston uchrashuvidan keyin vakillarimiz ustozi Temur Kapadze o‘yin haqida o‘z fikrlarini bildirib o‘tdi.

"O‘yin qiyin bo‘lishini bilardik, ammo nima bo‘lgan taqdirda ham g‘alaba qozondik. Dastlabki 3 ochko bilan muxlislarni tabriklayman. Turkmaniston ham yaxshi jamoa ekanligini bilardik. Albatta, bizda ko‘plab vaziyatlar bo‘ldi. Ammo raqib darvozaboni yaxshi o‘yin ko‘rsatdi. Futbolchilar yaxshi o‘ynashdi, lekin oxirgi nuqtani qo‘yishda bizga omad yetishmadi. Bosqichma-bosqich o‘z o‘yinimizni yaxshilab borishga harakat qilamiz. Jasur Jaloliddinov jarohat olgani yo‘q. U ko‘plab o‘yin o‘tkazgan, shu sabab unda ozroq charchoq sezildi. Ammo ertaga tibbiy ko‘rikdan o‘tadi va barchasini keyinchalik ma’lum bo‘ladi.

Bugun birinchi uchashuvdagi hayajon sezilib turdi. Umid qilamiz, keyingi o‘yinlarda bundanda yaxshiroq harakat qilishadi. Butun o‘yin davomida raqib qarshi hujumda harakat qildi. Ko‘p xatolar shuning evaziga yuzaga keldi. Bugungi o‘yinni yana ko‘rib chiqamiz va xatolarni to‘g‘rilashga harakat qilamiz. Standart vaziyatlarda ham ishladik. Lekin raqib jamoa ham standartlarni bermaslikka ham harakat qildi. Umuman olganda, futbolchilar bir-birini tushunishi uchun ozroq vaqt kerak. Futbolchilar o‘rtasidagi tushunmovchilikar bosqichma-bosqich yo‘qolib boraveradi deb umid qilamiz. Guruhda oson raqibning o‘zi yo‘q. Raqiblarning o‘yinlarini ko‘rib chiqdik. Umid qilaman, keyingi o‘yinlarda ham ijobiy natijalarga erisha olamiz", — dedi Kapadze.