Biz 2022 yilgi Jahon chempionatining barcha ishtirokchilari bilan tanishishga bir qadam yaqinlashdik! Ukraina terma jamoasi Yevropa pley-off bosqichining yarim finalida Shotlandiyani mag‘lub etib, Qatar yo‘llanmasi uchun hal qiluvchi bahsga yo‘l oldi. Terma jamoalarning asosiy turnirida hali kimda o‘ynash imkoniyati borligini aytib o‘tamiz.
Yevropa: Ukraina yoki Uels
O‘yini yaqinda yakunlangan Ukrainadan boshlaylik. Finalda Ukraina termasi mart oyida pley-off yarim finalida Avstriyani mag‘lub etgan (2:1) va shu vaqt davomida bo‘lajak raqibning aniqlanishini kutgan Uels bilan to‘qnash keladi.
UYEls va Ukraina o‘rtasidagi o‘yin 5 iyun kuni bo‘lib o‘tadi va Toshkent vaqti bilan soat 21:00da boshlanadi. Garet Beyl o‘zining so‘nggi yirik turniriga borishi uchun maydonga tushadi. Ukrainaliklar Shotlandiya bilan o‘yindan keyin yana mo‘jiza ko‘rsatishga intiladi.
Qit’alararo: Peru yoki BAA/Avstraliya, Kosta-Rika yoki Yangi Zelandiya
Bu yerda hamma narsa Yevropa saralashiga qaraganda ancha chalkash. Peru terma jamoasi uzoq vaqtdan beri Janubiy Amerika saralash guruhida beshinchi o‘rinni egallab, pley-offning finaliga chiqdi, ammo hali bo‘lajak raqibini bilib olgani yo‘q. BAA va Avstraliya o‘rtasidagi Osiyo pley-off finali g‘olibi nomi esa 7 iyun kuni aniqlanadi. O‘yin Toshkent vaqti bilan 23:00da start oladi.
Peru hamda BAA – Avstraliya juftligi g‘olibi ishtirokidagi hal qiluvchi o‘yin olti kundan so‘ng, 13 iyun kuni bo‘lib o‘tadi. Shuningdek, start hushtagi Toshkent vaqti bilan 23:00 da yangraydi.
Lekin bu hammasi emas. JCH-2022 uchun so‘nggi, 32-yo‘llanma bir kundan keyin o‘ynaladi. Qit’alararo bo‘g‘inlarning ikkinchi tomonida Kosta-Rika va Yangi Zelandiya terma jamoalari to‘qnash kelishadi. Kosta-Rikaliklar Shimoliy Amerika saralash guruhida to‘rtinchi o‘rinni egalladi. Yangi zelandiyaliklar, o‘z navbatida, Okeaniyadagi pley-offga yo‘l olishdi va u yerda finalda Solomon orollarini taslim qilishdi - 5: 0.
Kosta-Rika va Yangi Zelandiya o‘yini 14 iyun kuni bo‘lib o‘tadi. O‘yin Toshkent vaqti bilan 23:00 da boshlanadi. Ushbu o‘yindan so‘ng biz 2022 yilgi Jahon chempionatining barcha ishtirokchilarini bilib olamiz.
