Биз 2022 йилги Жаҳон чемпионатининг барча иштирокчилари билан танишишга бир қадам яқинлашдик! Украина терма жамоаси Европа плей-офф босқичининг ярим финалида Шотландияни мағлуб этиб, Қатар йўлланмаси учун ҳал қилувчи баҳсга йўл олди. Терма жамоаларнинг асосий турнирида ҳали кимда ўйнаш имконияти борлигини айтиб ўтамиз.
Европа: Украина ёки Уэльс
Ўйини яқинда якунланган Украинадан бошлайлик. Финалда Украина термаси март ойида плей-офф ярим финалида Австрияни мағлуб этган (2:1) ва шу вақт давомида бўлажак рақибнинг аниқланишини кутган Уэльс билан тўқнаш келади.
Уелс ва Украина ўртасидаги ўйин 5 июнь куни бўлиб ўтади ва Тошкент вақти билан соат 21:00да бошланади. Гарет Бэйл ўзининг сўнгги йирик турнирига бориши учун майдонга тушади. Украиналиклар Шотландия билан ўйиндан кейин яна мўжиза кўрсатишга интилади.
Қитъалараро: Перу ёки БАА/Австралия, Коста-Рика ёки Янги Зеландия
Бу ерда ҳамма нарса Европа саралашига қараганда анча чалкаш. Перу терма жамоаси узоқ вақтдан бери Жанубий Америка саралаш гуруҳида бешинчи ўринни эгаллаб, плей-оффнинг финалига чиқди, аммо ҳали бўлажак рақибини билиб олгани йўқ. БАА ва Австралия ўртасидаги Осиё плей-офф финали ғолиби номи эса 7 июн куни аниқланади. Ўйин Тошкент вақти билан 23:00да старт олади.
Перу ҳамда БАА – Австралия жуфтлиги ғолиби иштирокидаги ҳал қилувчи ўйин олти кундан сўнг, 13 июнь куни бўлиб ўтади. Шунингдек, старт ҳуштаги Тошкент вақти билан 23:00 да янграйди.
Лекин бу ҳаммаси эмас. ЖЧ-2022 учун сўнгги, 32-йўлланма бир кундан кейин ўйналади. Қитъалараро бўғинларнинг иккинчи томонида Коста-Рика ва Янги Зеландия терма жамоалари тўқнаш келишади. Коста-Рикаликлар Шимолий Америка саралаш гуруҳида тўртинчи ўринни эгаллади. Янги зеландияликлар, ўз навбатида, Океаниядаги плей-оффга йўл олишди ва у ерда финалда Соломон оролларини таслим қилишди - 5: 0.
Коста-Рика ва Янги Зеландия ўйини 14 июн куни бўлиб ўтади. Ўйин Тошкент вақти билан 23:00 да бошланади. Ушбу ўйиндан сўнг биз 2022 йилги Жаҳон чемпионатининг барча иштирокчиларини билиб оламиз.
