Sterling 2023 yilda erkin agentga aylanadi. Aftidan "Manchester Siti" unga yangi bitim taklif etish niyatida emas. Shu sabab hujumchi yangi jamoaga ko‘chishi mumkin. Biz esa uning manzili qayer bo‘lishini taxmin qilib ko‘ramiz. Demak, boshladik!
"Barselona"
Ha, katalon klubi Sterlingning eng yaqin ta’qibchilaridan biri sanaladi. "Barselona" uni yanvar oyidayoq sotib olmoqchi edi. Agar Sterling ketishni istasa, bemalol Ispaniyaga yo‘l olishi mumkin. Chunki "Barsa" bir qator hujumchilarini yozda qo‘yib yuboradi. Ular ichida Dembele, Breytueyt, Depay hamda Traorelar bor. Shunday ekan, Sterlingga jamoada joy topiladi. Harxolda, tarixda ham "Barselona" ko‘plab ingliz hujumchilari uchun sevimli joy bo‘lgan.
"Real Madrid"
Kilian Mbappedan ayrilgach, "qirollik klubi" yangi hujumchi sotib olish borasida bosh qotirishi lozim. Sterling esa o‘sha futbolchi bo‘lishi mumkin. Ha, Sterling balki Mbappening darajasida emasdir. Ammo u istalgan jamoaga oson moslasha oladi. O‘ylaymizki, Rahim uchun Madriddagi hayot qiyin bo‘lmaydi.
"Bavariya"
Shu kecha-kunduzda "Bavariya"dan ko‘ra ko‘proq yangilik taqdim etayotgan jamoani topish qiyin. Robert Levandovskining ketishi fonida, ko‘plab hujumchilar jamoaga talpinishi turgan gap. Shulardan biri "Liverpul" vakili Sadio Manedir. Ammo Sterling Manega qaraganda qulay va arzon variant hisoblanadi.
"Arsenal"
London shahriga qaytish, sobiq "QPR" futbolchisi uchun yana bir yo‘ldir. Lekin u bu safar poytaxtning kattaroq va mashhurroq jamoasida o‘ynash imkoniga ega bo‘ladi. Mikel Arteta "Man Siti" hamda Gvardiola bilan iliq munosabatlarga ega. Shunday ekan, Sterling uchun "Arsenal"ga o‘tish qiyin kechmaydi (agar buni o‘zi hoxlasa, albatta). "To‘pchilar"ga anchadan beri yangi hujumchi zarur bo‘lib turibdi. Sterling esa muhtojlikni yo‘q chiqarishi mumkin.
"Chelsi"
Jamoaning Romelu Lukaku hamda Timo Verner bilan bog‘liq rejalari ish bermadi. Bu ikki futbolchi ham yozda o‘zga jamoaga yo‘l olishi mumkin. Uni o‘rnini bosish uchun esa yangi xarid zarur. Todd Byoli buni juda yaxshi biladi. "Chelsi"da bu borada variantlar juda ham ko‘p emas. Shunday ekan, Sterling jamoaning muammolarini hali qilishi mumkin.
"Liverpul"
Nima deb o‘ylaysiz, bu sodir bo‘lishi mumkinmi? Ayni damda Sadio Mane jamoadan ketmoqchi, Muhammad esa yangi bitim tuzishga shoshilmayapti. Shunday bir paytda Klopp zaxira varianti sifatida hech bo‘lmasa bitta yangi hujumchi xarid qilishi kerak bo‘ladi. Bu esa jamoaning sobiq vakili Sterling bo‘lishi mumkin. Jahon futbolida bunday voqealar ko‘p kuzatiladi. Shu sabab, Sterlingning "Liverpul"ga qaytishini inkor eta olmaymiz.
ISMATOV J.
