U23 Osiyo Kubogi guruh bosqichi 2-turidan o‘rin olgan Qatar - O‘zbekiston (0:6) uchrashuvidan so‘ng termamiz bosh murabbiyi Timur Kapadze o‘z fikrlari bilan o‘rtoqlashdi.

"Hammani g‘alaba bilan tabriklayman. Bugun juda yaxshi o‘yin o‘tkazdik. Jasur Jaloliddinovning ahvoli yaxshi. Shunchaki, hisobdan kelib chiqib uni zaxiraga oldik. Birinchi navbatda jamoa bugun kuchli o‘yin ko‘rsatdi va bahs ham shunga yarasha shiddatli bo‘ldi.

Follarga keladigan bo‘lsak, buni ko‘rib chiqamiz. Turkmaniston himoyaviy o‘yin ko‘rsatdi. Shu sabab gol urishimiz qiyin kechgandi. Bugungi Qatarga qarshi o‘yin esa ochiq futbol bo‘ldi. Qo‘shnilarimiz bugun Eron ustidan g‘alaba qozonibdi, demak, ularni oson raqib deb bo‘lmaydi. Turkmaniston ham kuchli jamoa. Eronga qarshi o‘yin haqida o‘ylaganim yo‘q. U bahsda ham o‘yindan kelib chiqib tarkib tanlaymiz. Albatta, tarkibda bir qancha o‘zgarishlar bo‘ladi. Garchi keyingi bosqich masalasi hal bo‘lgan bo‘lsa-da, biz o‘sha o‘yinda ham g‘alaba qozonishni istaymiz.

Bugungi o‘yinga yaxshi tayyorgarlik ko‘rdik. Raqibning o‘yinidan kelib chiqib taktika tanladik. Shu sabab g‘alab qozondik deb o‘ylayman. Ertadan safardagi o‘yinga tayyorgarlikni boshlaymiz. Umid qilamanki, Qarshidagi o‘yin ham muxlislar bilan stadion to‘ladi. Chunki, Qashqadaryoda futbolni yaxshi ko‘rishadi", — dedi Kapadze.