U23 Осиё Кубоги гуруҳ босқичи 2-туридан ўрин олган Қатар - Ўзбекистон (0:6) учрашувидан сўнг термамиз бош мураббийи Тимур Кападзе ўз фикрлари билан ўртоқлашди.

"Ҳаммани ғалаба билан табриклайман. Бугун жуда яхши ўйин ўтказдик. Жасур Жалолиддиновнинг аҳволи яхши. Шунчаки, ҳисобдан келиб чиқиб уни захирага олдик. Биринчи навбатда жамоа бугун кучли ўйин кўрсатди ва баҳс ҳам шунга яраша шиддатли бўлди.

Фолларга келадиган бўлсак, буни кўриб чиқамиз. Туркманистон ҳимоявий ўйин кўрсатди. Шу сабаб гол уришимиз қийин кечганди. Бугунги Қатарга қарши ўйин эса очиқ футбол бўлди. Қўшниларимиз бугун Эрон устидан ғалаба қозонибди, демак, уларни осон рақиб деб бўлмайди. Туркманистон ҳам кучли жамоа. Эронга қарши ўйин ҳақида ўйлаганим йўқ. У баҳсда ҳам ўйиндан келиб чиқиб таркиб танлаймиз. Албатта, таркибда бир қанча ўзгаришлар бўлади. Гарчи кейинги босқич масаласи ҳал бўлган бўлса-да, биз ўша ўйинда ҳам ғалаба қозонишни истаймиз.

Бугунги ўйинга яхши тайёргарлик кўрдик. Рақибнинг ўйинидан келиб чиқиб тактика танладик. Шу сабаб ғалаб қозондик деб ўйлайман. Эртадан сафардаги ўйинга тайёргарликни бошлаймиз. Умид қиламанки, Қаршидаги ўйин ҳам мухлислар билан стадион тўлади. Чунки, Қашқадарёда футболни яхши кўришади", — деди Кападзе.