Hafta yakunida yengil atletikachi qizlarimiz Yevropa maydonlarida o‘tkazilgan turli xalqaro musobaqalarda ishtirok etib, yuqori natijalarni ko‘rsatishdi. Jumladan, Safina Sa’dullayeva Germaniyada o‘tgan musobaqada g‘alaba qozongan bo‘lsa, Yekaterina Voronina hamda Darya Reznichenko Ispaniyadagi turnirda qatnashdi.

Relingen-Zirsburg shahrida o‘tgan “57th International Pentecost Sport Meeting Rehlingen” musobaqasi Sa’dullayeva uchun muvaffaqiyatli yakunlandi. Yurtdoshimiz bu gal 1,88 metr balandlikni zabt etishga erishdi.

Balandlikka sakrash, ayollar:
1. Safina Sa’dullayeva (O‘zbekiston) – 1,88 metr
2. Oksana Okuneva (Ukraina) – 1,85
3. Imke Onnen (Germaniya) – 1,82

Ikki karra Olimpiya o‘yinlari qatnashchisi, ko‘pkurashchimiz Yekaterina Voronina Ispaniyada «oltin» darajadagi “XI Meeting Internacional Arona Pruebas Combinadas Tenerife 2022” turnirida qatnashdi. 18 nafar mahoratli sportchilar ishtirok etgan musobaqada Yekaterina 6072 ochko bilan to‘rtinchi natijani qayd etdi. Ta’kidlash joiz, bu osiyolik ko‘pkurashchilar orasida mavsumning eng yuqori ko‘rsatkichi bo‘ldi. Voronina har bir yo‘nalishlarda quyidagi natijalarni ko‘rsatdi: to‘siqlar osha 100 metr – 14.50 (909 ochko), balandlikka sakrash – 1,73 (801), yadro uloqtirish – 13,64 (770), 200 metr – 25,52 (840), uzunlikka sakrash – 6,02 (856), nayza uloqtirish – 50,45 (869, 800 metr 2:11.90 (937).

Ko‘pkurash, ayollar:
1. Xari Xovkins (AQSH) – 6243 ochko
2. Klaudiya Konte (Ispaniya) – 6174
3. Mariyke Esselnik (Niderlandiya) – 6087
4. Yekaterina Voronina (O‘zbekiston) – 6072

Anduxar shahri mezbonlik qilgan «bronza» darajadagi “Meeting Jaén Paraíso” turnirida ishtirok etgan Darya Reznichenko uzunlikka sakrash dasturida to‘rtinchi pog‘onadan joy oldi.

Uzunlikka sakrash, ayollar:
1. Fatima Diame (Ispaniya) – 6,76
2. Yasmin Koale (Burkina-Faso) – 6,42
3. Irati Mitxelena (Ispaniya) – 6,37
4. Darya Reznichenko (O‘zbekiston) – 6,32