O‘zbekiston milliy terma jamoasi bosh murabbiyi Srechko Katanes va futbolchimiz Jaloliddin Masharipov matbuot anjumanida ishtirok etib, o‘yin haqidagi fikrlari bilan o‘rtoqlashishdi.

— Avvalo shogirdlarimga rahmat aytaman. Chunki bugun ular o‘z jarima maydonchasi ichida himoyalangan jamoaga qarshi gol urish uchun maksimal darajada imkoniyat qidirishdi. Har xil uslubda hujumlar tashkil etib, raqib himoyasini yorib kirishga harakat qilishdi. Uchrashuvdagi qiyin vaziyatlarda standartlar orqali maqsadiga yetishishdi.

Faqat himoyalanadigan jamoalarga qarshi o‘ynash har doim qiyin hisoblanadi. Men hamisha o‘yinning oxiriga qadar xotirjamlikka berilib bo‘lmasligini ta’kidlab kelaman. Oldimizda yana 2 ta muhim uchrashuvlar bor. Ularga jiddiy tayyorgarlik ko‘rib, natijamizni yaxshilab borishga harakat qilamiz.

Jaloliddin Masharipov:

— Aslida biz bu bosqichda qatnashishimiz kerak emasdi. Biroq shu bosqichga o‘zimiz tushdik va uni o‘zimiz to‘g‘rilashimiz kerak. Biz avvalgidek Eron va Koreya kabi kuchli jamoalarga raqobat qila oladigan darajaga ko‘tarilishni maqsad qildik. Bu maqsad yo‘lida bor kuchimizni ishga solishga tayyormiz.