“Andijon” – “Xorazm” (2:1) uchrashuvidan keyin o‘tkazilgan matbuot anjumanida dastlab mehmonlar bosh murabbiyi Ruslan Ahmedov savollarga javob qaytardi.

— Birinchi navbatda “Andijon” muxlislarini g‘alaba bilan tabriklayman. Ular g‘alabaga haqli edi. Shunga yarasha ko‘proq imkoniyatlarni yaratishdi. To‘g‘ri, ikkinchi bo‘limda qarshi hujumlarda vaziyatlar yaratishga harakat qildik. Ammo “Andijon”da tajribali o‘yinchilar bor, yaxshi shakllangan jamoa. O‘z maydonimizda bu klubni mag‘lubiyatga uchratganimizdan keyin ham “Andijon” hali o‘z so‘zini aytadi, deb ta’kidlagandim. Superligaga chiqish uchun “Turon” bilan “Andijon” asosiy nomzodlar deb o‘ylayapman. Tajribali murabbiy ishlayapti, shakllangan jamoa. Tarkibimizda pro ligada umuman o‘ynamagan 5-6 ta futbolchilar bor. Tajribalari yetarli bo‘lmagani evaziga xatoga yo‘l qo‘yishib, gol o‘tkazdik. Bu – futbol.

— “Andijon” siz kutgan o‘yinni ko‘rsatdimi yoki...
— Shunday o‘yin kutgandik va shunga yarasha tayyorlangandik. Tarkibimiz yoshroq bo‘lgani bois safarlardagi uchrashuvlarda tajriba yetishmayapti. O‘z uyimizda esa yaxshi o‘ynayapmiz. Strategiyamiz bo‘yicha yoshlarni asta-sekin yetishtirib, tarkibimizni yoshartirmoqchimiz. Balki keyinchalik jiddiy maqsad qo‘yilishi ham mumkin.

— O‘yin boshida jamoangizda himoyaviy o‘yin ko‘rdik. Hisob qisqarganidan keyin hujumga ko‘proq o‘tildi...
— Futbol shunaqa. Futbol tempi bo‘yicha boshida 15-20 daqiqa davomida mezbonlar bosim qiladi. Keyin temp tiklanadi. Butun dunyoda shunaqa. Taktikamiz ham shunday edi. Ko‘p hujum qilamiz, degan umidimiz ham yo‘q edi. Sanoqli qarshi hujumlarga tayyorlanib turgandik. Ulardan bittasi amalga oshdi, qolganini o‘zinglar ham ko‘rdinglar, amalga oshmadi. Kuchimiz ham yetmadi. “Andijon” jamoasi tarkib va jismoniy holat bo‘yicha ham bizga nisbatan yaxshiroq.

— Safarda jamoangiz yaxshi o‘ynay olmayotganini aytdingiz. Bu maydon bilan bog‘liq emasmi? Chunki o‘z uyinglarda sun’iy maydonda o‘ynaysizlar. Yaqinda esa tabiiy maydonga o‘tasizlar.
— To‘g‘ri, markaziy stadionimiz tayyorlanyapti. Balki ikkinchi davra arafasida foydalanishga topshirishar. Savolingiz to‘g‘ri. Imkon qadar bu yerga kelishimizdan oldin 2-3 kun tabiiy maydonda shug‘ullandik. Ammo baribir bu yetarli emasdi.

“Andijon” matbuot xizmati.