UYEFA Millatlar ligasi musobaqasi "C" ligasi 3-guruhidan o‘rin olgan Qozog‘iston va Slovakiya terma jamoalari o‘rtasidagi 4-tur bahsi yakuniga yetdi. Unda qo‘shnilarimiz kuchli raqibni yana bir marta mag‘lub etishga muvaffaq bo‘lishdi.

Mezbonlar 18-daqiqada Vorogovskiyning goli evaziga hisobni ochishgan bo‘lsa, birinchi bo‘lim tugashiga 6 daqiqa qolganida Astanov farqni ikkitaga oshirdi.

Slovakiya ikkinchi bo‘lim boshida bitta javob to‘pini kiritdi. Ammo ular raqib darvozasiga boshqa yo‘l topa olishmadi. Shu tariqa, Qozog‘iston ikkinchi marta ushbu raqibni mag‘lub etdi. Ular 6 iyun kuni safardagi uchrashuvda 1:0 hisobida g‘alaba qozonishgandi.

Qozog‘iston ushbu g‘alabadan so‘ng o‘z ochkolarini 10taga yetkazib oldi va o‘z peshqadamligini mustahkamladi. Slovakiya hisobida 6 ochko mavjud. Qo‘shnilarimiz Belarus va Ozarboyjonga qarshi kechadigan so‘nggi 2ta turda 2 ochko jamg‘arishsa, "B" ligaga ko‘tarilishadi.

Millatlar ligasi, "C" liga, 3-guruh, 4-tur
Qozog‘iston – Slovakiya 2:1 (2:0, 0:1)
13 iyun, 19.00, «Astana Arena»
Gollar: 1:0 – 18 Vorogovskiy, 2:0 – 39 Astanov, 2:1 – 51 Bero.
Qozog‘iston – Shaskiy, Gabishev (Kairov, 73), Maliy, Marochkin, Alip, Dosmagambetov, Vorogovskiy (Orazov, 74), Astanov (Logvinenko, 84), Darabayev (Erlanov, 88), Tagibergen, Aymbetov (Samorodov, 88).
Slovakiya – Rodak, Pekarik, Dyomber, Valyent, Xvatal (De Marko, 46), Kuska, Garaslin (Suslov, 89), Groshovski, Bero (Almashi, 82), Duda, Rusnak (Streles, 72).
Ogohlantirishlar: Dyomber (23), Orazov (86), Duda (86), Almashi (90), Kuska (90).
Chetlatish: Duda (87).