«Barselona» sardori Serxio Buskets maoshini kamaytirishdan bosh tortdi.

11 iyun kuni Kataloniya klubi direktori Mateu Alemani futbolchining vakili Xose Mariya Orobit bilan uchrashib, maoshni qisqartirish masalasini muhokama qilgan. Alemani hozirgi iqtisodiy tang ahvolda «Barselona» futbolchilari maoshlarining bir qismidan voz kechishi kerakligini tushuntirgan. Faqat shu tufayli jamoa yozda kimnidir sotib olishi mumkin bo‘ladi.

Marca nashrining xabariga ko‘ra, birinchi yig‘ilish natijalariga ko‘ra, hech qanday qaror qabul qilinmagan — Buskets maoshi qisqarishi rozi bo‘lmagan.

Serxioning amaldagi shartnomasi bir yildan so‘ng o‘z nihoyasiga yetadi. «Barselona»ning boshqa o‘yinchilari singari Buskets ham koronavirus pandemiyasi ta’siri tufayli maoshlarini qisqarishiga rozilik bildirgan. Ammo kataloniyaliklar jamoa sardorlari Buskets, Xerard Pike, Xordi Albani yana bir bor maoshi kamayishiga rozi bo‘lishiga ko‘ndirish istagida.

Avvalroq, Xavi bilan suhbatda Pike maoshi qisqarishiga rozi bo‘lgani xabar qilingandi. «Barselona» rahbariyati aksariyat futbolchilarining maoshini 50 foizga qisqartirmoqchiligi, bu yaqinda shartnomasini uzaytirgan va qishki transfer oynasida jamoaga qo‘shilganlarga taalluqli emasligi xabar qilingandi. «Barselona» Yevropaning eng ko‘p qarzga ega klublari ro‘yxatida yetakchilik qilayotgani ma’lum bo‘lgandi.

Serxio Buskets 2021/22 yilgi mavsum «Barselona» safida barcha musobaqalarda 50 ta o‘yinda maydonga tushib 3 ta golga mualliflik qilgan.