«Bavariya» «Liverpul» bilan Sadio Mane transferi bo‘yicha kelishuvga erishishga harakat qilmoqda.

Bild’ning yozishicha, myunxenliklar 35+5 million yevro ko‘rinishidagi uchinchi taklifni tayyorlamoqda.

Iyun oyi boshida «Liverpul» Sadioni 21+4 million yevroga sotishga rozi bo‘lmagandi. Shundan so‘ng myunxenliklar ketma-ket uchta «Oltin to‘p» va Chempionlar Ligasidagi uchta g‘alaba uchun bonuslarni hisobga olgan holda 35 million yevrolik taklif yuborgan. Ammo u ham rad etilgan.

Ma’lum bo‘lishicha, ingliz klubi vinger uchun 50 million yevro olmoqchi bo‘lgan, biroq keyinchalik bu talab 45 million yevrogacha qisqargan.

Avvalroq Sadio Mane yozda «Liverpul»ni tark etishi ma’lum qilingandi. Mersisayd klubi senegallik futbolchi o‘rniga «Chelsi»dan Kristian Pulishichni olib kelmoqchiligi xabar qilingan.

30 yoshli futbolchi 2021/22 yilgi mavsum «Liverpul» safida barcha musobaqalarda 50 ta o‘yinda maydonga tushib, 23 ta gol va 2 ta golli uzatmaga mualliflik qilgan.