Kechagi o‘yinning zavqi bo‘lak. Bahs nihoyasiga yetgach o‘yingohga kirolmagan muxlislar futbolchilarimiz avtobusini kutib turgani ham harorat va hislar o‘zgacha bo‘lganini ko‘rsatadi.

Muxlislarsiz stadionda o‘ynash qiyin. Bu aniq. Lekin uchrashuvdan so‘ng yarim hazil, yarim chin ohangda bosh murabbiy futbolchilar ovozimni ko‘proq eshitishdi, dedi.

Ochig‘i, murabbiy masalasi alohida. Timur Kapadze aqlli mutaxassis ekanini yana bir bor isbotladi. Matbuot anjumanida undan qanday sabab bilan dastlab Hojimat Erkinov, so‘ng Jasur Jaloliddinovni zaxiraga olgani haqida so‘rashadi, deb kutgandim. Ko‘rinishidan bunday savol yangramagan.

Bunday vaqtda o‘yinda asosiy vazifani bajarayotgan futbolchilarni almashtirishga uncha-buncha murabbiy jazm etmaydi. Aslida sharh mobaynida maestro buning izohini aytib ketdi. Davron Fayziyev aytganday, Kapadze ixtiyorida zaxirada ham alohida funksiyali kuchli futbolchilar mavjud. Sodiqov, Jiyanov, Odilov va Fayzullayev o‘yinga zaxiradan qo‘shilar ekan, murabbiyning aniq hisobi bilan qo‘shildi. Qandaydir oddiy — "bu charchadi va olish kerak" qabiladagi o‘zgarish emasligi sezilardi. Natijada o‘rindoshlar o‘yinga silliq qo‘shildi. Yetakchilarni maydondan olib yanglishmadi murabbiy.

Eyforiyaga berilgim yo‘q. Bu yigitlarning asosiy maqsadi Parij-2024 ekanini bilamiz. Biroq ko‘ryapmizki, ular har bir yutug‘iga xarakter ko‘rsatib erishmoqda. Tasodif yoki boshqa faktorlar minimum.

Finalda turnir doirasida hali gol o‘tkazmagan Saudiya Arabistoniga qarshi o‘ynaymiz. Ko‘rinishidan ular barcha o‘tkizilajak gollarni ulgurjisiga O‘zbekiston terma jamoasi vakillari uchun saqlab qo‘yishgan. Nasib qilsa, biz mezbon sifatida qabul qilayotgan bu turnirda g‘alaba qozonamiz.

Finaldagi natija qanday bo‘lishidan qat’i nazar futbolchilarga aytar so‘zim bor: Iltimos, o‘sishdan to‘xtab qolmang. Biz "oltin avlod"larni yo‘qotaverib charchab ketganmiz. Yo‘l-yo‘lakay keladigan shuhrat va mashhurlik, ehtimol katta mukofotlar sizni chalg‘itmasin! Qanchalik qiyin bo‘lmasin oxirigacha boring!

Parij olimpiadasi, Shimoliy Amerika mundiallarigacha boring! To‘xtamang! To‘xtashga haqqingiz yo‘q!

Orif Tolipov.