Yaponiya U23 terma jamoasi bosh murabbiyi Go Oiva O‘zbekistonga qarshi bo‘lib o‘tgan o‘yindan keyin o‘z fikrlari bilan o‘rtoqlashdi.

"Biz ushbu musobaqaga chempion bo‘lish maqsadida tashrif buyurgandik. Biz mazkur turnirga shunchaki Parij-2024 yo‘llanmasi uchun kurashda tajriba to‘plash maqsadida qaramaganmiz.

Bugungi mag‘lubiyat uchun mas’uliyatni o‘z zimmamga olib, O‘zbekistonni g‘alaba bilan tabriklayman.

Ochig‘ini aytsam, mazkur o‘yinga reja ishlab chiqqandik, o‘yinchilarni imkon qadar yaxshi tayyorlagandik, ammo rejamiz ish bermadi. Birinchi bo‘limda xatolarga yo‘l qo‘ydik. Ikkinchi taymda esa ularni to‘g‘irlashga harakat qildik. Ammo buning uddasidan chiqa olmadik.

Mag‘lubiyatni qabul qilish qiyin, ammo bugungi o‘yindan xulosa chiqarib, Avstraliyaga qarshi bahsda muvaffaqiyatga erishishga harakat qilamiz", — dedi Oiva.