Afsonaviy angliyalik futbolchi Ueyn Runining o‘g‘li Kay Runi 12 yoshgacha bo‘lgan o‘g‘il bolalar o‘rtasida “Manchester Yunayted” akademiyasida o‘yinlarda foydali harakatlar (gol+pas) ijro etish bo‘yicha rekord o‘rnatdi, deb xabar bermoqda mankunianliklar matbuot xizmati ijtimoiy tarmoqlarda.
12 yoshli Runi o‘tgan mavsumda 56 ta gol urdi va 28 ta golli uzatmani amalga oshirdi.
Ueyn Runi 2004 yildan 2017 yilgacha "Manchester Yunayted"da o‘ynagan. U 559 ta o‘yinda 253 ta gol urib, klub tarixidagi eng yaxshi to‘purar hisoblanadi. Runi ayni damda Angliyaning "Derbi Kaunti" jamoasini boshqarmoqda.