Yurtimizda o‘tayotgan 23 yoshgacha bo‘lgan futbolchilar o‘rtasidagi Osiyo chempionatining final uchrashuviga bo‘lgan qiziqish juda yuqori. O‘zbekistonlik muxlislar Temur Kapadze jamoasining Saudiya Arabistoniga qarshi bahsini stadiondan tomosha qilishni niyat qilishgan. Ammo barchaga chipta yetkazishning imkoni yo‘q.
Kecha "Bunyodkor" stadioni kassalarida chiptalar savdoga chiqarilgach, katta navbatlar yuzaga keldi. "Qo‘l"ga chiqib ketgan chiptalarning narxlari esa bir necha barobar oshib ketgan.
Shuningdek, kecha 1800dan boshlab iticket onlayn platformasida ham chiptalar savdosi boshlandi. Tashrif buyuruvchilar soni keskin ko‘p bo‘lgani sabab sayt ishida texnik muammolar kuzatildi. Muammo bartaraf etilgach esa, soat 23:00gacha 10 mingta chipta sotib bo‘lingan. Bugun tongda esa iticket chiptalar to‘liq sotilib ketgani haqida xabar bermoqda.
Musobaqaning uchinchi o‘rni uchun kechadigan Avstraliya va Yaponiya o‘rtasidagi bahs uchun esa chiptalar sotilmoqda. Bu o‘yinga chiptalar narxi — 15.000 so‘mdan 50.000 so‘mgacha.
