Yaqin orada FIFA 2023 yilning fevralida BAAda klublar o‘rtasidagi jahon chempionati o‘tkazilishi haqida e’lon qiladi. Prinsipial qaror allaqachon qabul qilib bo‘lingan. Faqat rasmiyatchilik qolgan xolos.

Bundan anglash mumkinki, keyingi yil fevralida OFK Chempionlar Ligasi o‘yinlari o‘tkazilmaydi. Birinchidan, FIFA OFKning klublar o‘rtasidagi JCHda qatnashadigan vakilini aniqlab olishi zarur. Avvalgi turnir g‘olibi («Al-Hilol»)ning ishtirok etish varianti FIFAni qoniqtirmaydi. Mabodo, qoniqtirganda ham, OCHLning G‘arb mintaqasidagi uchrashuvlari fevralda o‘tkazilmasdi, axir «Al-Hilol» bir vaqtning o‘zida ikki turnirda qatnasholmaydi. Ikkinchidan, bir klubni ikki marta JCHga jo‘natish Osiyoning boshqa klublarga nisbatan adolatdan bo‘lmaydi. Qolaversa, bu sport va moliyaviy nuqtai nazardan ham noto‘g‘ri.

Shunday ekan, OFK endi taqvimda Chempionlar Ligasini yakunlash uchun yangi sanalarni izlamoqda. Qatardagi jahon chempionati bahslari 18 noyabrda boshlanishini inobatga olsak, ikkita asosiy variant bor - 2022 yilning sentyabri yoki 2023 yilning yanvari. Ammo BAA va Saudiya Arabistoni vakillari ikkinchi variantga qarshilar. Ularga Chempionlar Ligasi bahslari yanvarda Iroqda o‘tadigan Ko‘rfaz kubogi turniri bilan bir vaqtga to‘g‘ri kelib qolishi yoqmayapti.

Demak, joriy yilning sentyabri OCHL o‘yinlari uchun optimal vaqtdek ko‘rinmoqda va «Nasaf» aynan shu muddatga tayyorgarlik ko‘raverishi kerak.

Alisher NIKIMBAYEV