Shu yilning yozgi transfer oynasida “Chelsi” ikki yil avval klubga 40 million yevro evaziga ko‘chib o‘tgan yarim himoyachisi bilan xayrlashishi mumkin. Jurnalist Natan Gissingning ma’lumotlariga ko‘ra, gap kecha klub rahbariyatiga o‘zini transferga qo‘yishlarini so‘rab chiqqan Hakim Ziyesh haqida ketmoqda.
Futbolchining transferiga asosiy davogar Italiya chempioni “Milan” hisoblanadi. "Rossonerlar" futbolchiga o‘tgan yozda qiziqish bildirgandi, ammo "Chelsi" rahbariyati uni qo‘yib yuborishga shoshilmagandi.
Eslatib o‘tamiz, Ziyesh "Chelsi"ga Amsterdamning "Ayaks" klubidan o‘tgan edi. Futbolchi klub bilan bir qator sovrinlarni, jumladan, Chempionlar ligasini qo‘lga kiritdi, biroq “Stemford Bridj”ga o‘tganidan beri marokashlik futbolchi asosiy tarkibda barqaror o‘yinchiga aylana olmadi.