Kamerun termasi yaqinda o‘rtoqlik bahsida Burundi jamoasini 1:0 hisobida mag‘lubiyatga uchratdi. Yagona gol Karl Toko-Ekambi hisobiga yozildi.
Minimal ko‘rinishdagi natija termaning sobiq hujumchisi, hozirda Kamerun futbol assosiasiyasi prezidenti sifatida faoliyat yuritayotgan Samyuel Eto‘Oga yoqmadi. U o‘yindan keyin kiyinish xonasiga kirib, qahrini sochdi.
«Juda noroziman, qaysi jamoaga qarshi o‘ynayotganingiz ahamiyatsiz, sizlar Kamerun sharafini himoya qilyapsiz! Xafaman. Bir vaqtlari termamizdagi muammolar sabab jahon chempionatini o‘tkazib yuborganman. Mening prezidentlik davrimda bunday muammo qaytarilmaydi. Bu jamoada faqat munosiblar to‘p suradi, tarkibdan hech kimga joy kafolatlanmaydi. Siz o‘z ishingizni qilishingiz kerak, vazifasini bajara olmaganlar ketadi. Men ham bir necha yillar avval sizning o‘rningizda bo‘lganman. Ko‘pchiligingiz «U ahmoq» deb o‘ylayotgan bo‘lishi mumkin. Ammo men eng zo‘ri bo‘lganman deya olaman. Sizlar yaxshi holatda bo‘lishingiz uchun borimni, kerak bo‘lsa, hayotimni berishga ham tayyorman. Bu yerda o‘tirib, sizlar uchun astoydil kurashayotganimdan bexabarsizlar. Jamoa ixtiyoriga kelishimiz Kamerun uchun, yigitlar. Men uchun Kamerundan yaxshiroq narsa yo‘q. O‘z mamlakatim uchun jonimni beraman».
So‘ngra Eto`O futbolchilarga jahon chempionati payti milliy jamoa tarkibida joy kafolatlanmaganini eslatib o‘tdi: «Ushbu sayohatda qatnashishni istasangiz, ishlashingiz kerak. Bundan ko‘prog‘ini xohlayman, chunki jahon chempionatida g‘olib chiqishni orzu qilaman. Futbolchi sifatida men yo‘liqqan muammolar endi takrorlanmaydi. Men omadsizlikka uchradim, chunki kiyinish xonamizdagi muhit yaxshi emasdi. Vaholanki, safimizda ajoyib futbolchilar bo‘lishgan. Barchamiz baxtiyorlik hissini sezsak, muvaffaqiyatga erishamiz».
Eslatib o‘tamiz, JCH-2022 «G» guruhida Kamerunga Braziliya, Shveysariya va Serbiya raqib bo‘ladi.
A.ABDUVALIXO‘JAYEV tayyorladi
