Xabaringiz bor, 17 iyuldan Toshkent shahri o‘smirlar va yoshlar o‘rtasidagi Osiyo chempionati bahslariga mezbonlik qilyapti. Quvonarlisi, «Yunusobod» sport majmuasida bo‘lib o‘tayotgan musobaqada bugun hamyurtimiz sovrindorlar qatoridan joy oldi.

Yoshlar o‘rtasida -55 kg vazn toifasining «B» guruhida Layloxon Polvonnazarova siltab ko‘tarish mashqida 70 kg toshni bo‘ysundirib, kumush medalga sazovor bo‘ldi. Dast ko‘tarish mashqida esa u 91 kg og‘irlikni zabt etib, 3-o‘rinni hamda ikkikurash natijasiga ko‘ra umumiy 161 kg natija bilan katta bronza medalini qo‘lga kiritdi.

Ushbu vazn toifasida, faqat yoshlar o‘rtasida ishtirok etgan yana bir hamyurtimiz Ozoda Xojiyevaga esa biroz omad yetishmadi.

Shu tariqa, uchinchi kungi bellashuvlarda vakilamiz ilk medallarni qo‘lga kiritdi.

Osiyo chempionati bahslari davom etmoqda. Bugun soat 18:30da sportchimiz Diyorbek Ro‘zmetov -61 kg vaznda A guruhida o‘z ishtirokini boshlaydi.

Ma’lumot uchun, o‘smirlar va yoshlar o‘rtasidagi Osiyo chempionati 25 iyulga qadar davom etadi.