Tojikistonning Dushanbe shahrida Markaziy Osiyo mamlakatlari ayollar milliy jamoalari o‘rtasida o‘rtasidagi musobaqa yakunlandi. O‘zbekiston terma jamoasi turnirdagi barcha 4ta o‘yinda g‘alaba qozonib, musobaqa g‘olibiga aylandi.

Eronga qarshi kechgan so‘nggi tur bahsida Midori Xonda shogirdlarini durang natija ham qanoatlantirar edi. Vatandoshlarimiz tajovuzkor o‘yin namoyish etib, kuchli raqibni ham mag‘lub etishga muvaffaq bo‘lishdi.

Hamyurtlarimiz o‘yin davomida raqib darvozasi tomon bir nechta zarbalar berishdi. Eronlik posbon yaxshi harakat qilib, ularni qaytarishga muvaffaq bo‘ldi. Bahs tugashiga 6 daqiqa qolganida Nilufar Qudratov raqib jarima maydoni tashqarisida 2-3 himoyachidan o‘tib ketib, jamoadoshini zarbavor vaziyatga chiqardi. Maftuna Shoyimovaning 18 metrdan yo‘llagan zarbasini darvozabon qaytara olmadi.

Ushbu gol o‘yinda yagonaligicha qoldi. Shu tariqa, O‘zbekiston ayollar milliy jamoasi 12 ochko to‘plab, Markaziy Osiyo mintaqasida tengsiz ekanini isbotladi. Eron esa 9 ochko bilan 2-o‘rinni band etdi. Qizlarimiz musobaqa davomida o‘z darvozalaridan birorta ham to‘p o‘tkazib yuborishmagani e’tiborga molik.

CAFA Wpmen's championship-2022. 5-tur
O‘ZBEKISTON - ERON - 1:0 (0:0)
Gol: Maftuna Shoyimova (84)