Тожикистоннинг Душанбе шаҳрида Марказий Осиё мамлакатлари аёллар миллий жамоалари ўртасида ўртасидаги мусобақа якунланди. Ўзбекистон терма жамоаси турнирдаги барча 4та ўйинда ғалаба қозониб, мусобақа ғолибига айланди.

Эронга қарши кечган сўнгги тур баҳсида Мидори Хонда шогирдларини дуранг натижа ҳам қаноатлантирар эди. Ватандошларимиз тажовузкор ўйин намойиш этиб, кучли рақибни ҳам мағлуб этишга муваффақ бўлишди.

Ҳамюртларимиз ўйин давомида рақиб дарвозаси томон бир нечта зарбалар беришди. Эронлик посбон яхши ҳаракат қилиб, уларни қайтаришга муваффақ бўлди. Баҳс тугашига 6 дақиқа қолганида Нилуфар Қудратов рақиб жарима майдони ташқарисида 2-3 ҳимоячидан ўтиб кетиб, жамоадошини зарбавор вазиятга чиқарди. Мафтуна Шойимованинг 18 метрдан йўллаган зарбасини дарвозабон қайтара олмади.

Ушбу гол ўйинда ягоналигича қолди. Шу тариқа, Ўзбекистон аёллар миллий жамоаси 12 очко тўплаб, Марказий Осиё минтақасида тенгсиз эканини исботлади. Эрон эса 9 очко билан 2-ўринни банд этди. Қизларимиз мусобақа давомида ўз дарвозаларидан бирорта ҳам тўп ўтказиб юборишмагани эътиборга молик.

CAFA Wpmen's championship-2022. 5-тур
ЎЗБЕКИСТОН - ЭРОН - 1:0 (0:0)
Гол: Мафтуна Шойимова (84)