"Barselona"ning keraksiz futbolchilarni ish bilan ta’minlashdagi muammolari davom etmoqda. Hujumchi Memfis Depay, agar Kataloniya klubi shartnomani bekor qilsagina klubni tark etishga roziligini aytdi.
Bu yozda "Barsa" bosh murabbiy Xavining rejalarida bo‘lmagan forvarddan qutulishga harakat qilmoqda. Avvalroq, futbolchiga Premer-liganing bir qancha klublari qiziqish bildirayotgani haqida xabarlar chiqqandi, biroq Depay Premer-ligaga o‘tishga unchalik ishtiyoq bildirmagandi.
"Barselona" futbolchining narxini 15 million yevroga tushirishi kerak edi. Depayning shartnomasi kelasi yozda tugaydi va u bir yilni zaxira o‘rindig‘ida o‘tkazishga tayyor.
Biroq ispan manbalarining xabar berishicha, agar “Barsa” rahbariyati hujumchi bilan shartnomani buzsa, Depay jamoani tark etishga tayyor. Jarima qancha bo‘lishi hozircha oshkor etilmagan.
