Mamlakat milliy chempionatining ikkinchi davra bahslariga tayyorgarlik ko‘rayotgan Bekobodning “Metallurg” jamoasi kecha navbatdagi nazorat uchrashuvini safarda Tojikistonning “Xo‘jand” jamoasiga qarshi o‘tkazib, yana yirik hisobda zafar quchdi. Gollarga boy o‘tgan bu bahsda "Ma’danchilar" maydon egalarini 5:1 hisobida mag‘lubiyatga uchratishdi.
Dastlab, mezbonlarning legioner hujumchisi Ilya Kojuxar tomonidan hisob ochilgandi. Shundan keyin tashabbusni to‘liq o‘z qo‘liga olgan “Metallurg” maydon egalari darvozasi yonida ketma ket xavfli vaziyatlarni yaratdi va ulardan beshtasidan unumli foydalandi. Jamoaning hujum chizig‘ida ko‘rikdan o‘tayotgan Bobur Farhodov ikkita gol urib, dublni rasmiylashtirdi. Shuningdek, Behruz Shodmonov, Bektemir Abdumannonov va Anvar G‘ofurov ham o‘z hisoblariga bittadan gol yozdirib qo‘yishdi.
Shu tariqa, “Metallurg” Tojikistonning “Xo‘jand” jamioasiga qarshi bu yil hisobidan o‘tkazilgan ikkinchi o‘rtoqlik o‘yinida ham yirik hisobda g‘alaba qozondi. Yodingizda bo‘lsa, dastlabki o‘yin bundan ikki oy muqaddam Bekobodda – “Metallurg” hujumchisi Zohid Abdullayevning katta futbol bilan xayrlashuv uchrashuvida kuzatilgandi. O‘shanda bekobodliklar 3:0 hisobida zafar quchishgandi. Bu safar Xo‘jandda kechgan javob uchrashuvida ham omad Toshkent viloyati vakillari tomonida bo‘ldi.
Nazorat uchrashuvi
23 iyul, shanba
“Xo‘jand” (Tojikiston) – “Metallurg” (O‘zbekiston) – 1:5
Gollar: Ilya Kojuxar – Bobur Farhodov (2 ta), Behruz Shodmonov, Bektemir Abdumannonov, Anvar G‘ofurov.
