Xabaringiz bor, ayni kunlarda yurtimizda og‘ir atletika bo‘yicha o‘smirlar va yoshlar o‘rtasidagi Osiyo chempionati bo‘lib o‘tmoqda.
Bugun 5 nafar atletimiz supachaga chiqishdi. Quvonarlisi, ularning barchasi shohsupaga ko‘tarildilar. Iqtidorli vakilalarimizdan biri Nigora Suvonova -81 kg vazn toifasida ham o‘smirlar, ham yoshlar toifasida barcha yo‘nalishlar bilan hisoblaganda jami 6 ta oltin medalga sazovor bo‘ldi.
O‘smirlar:
-81 kg vazn toifasida Nigora Suvonova barcha yo‘nalishlarda 3ta oltin medal bilan 1-o‘rinni egalladi – 212 (95+117) kg;
+102 kg vazn toifasida Nurbol Abdurashidov 3ta kumush medalni qo‘lga kiritdi – 316 kg (145+171) kg;
+81 kg vazn toifasida Xushnoza Xoliqova barcha yo‘nalishlarda sovrindor bo‘ldi, 3ta bronza – 185 (95+104) kg.
Yoshlar:
-81 kg vazn toifasida Nigora Suvonova bu gal ham barcha yo‘nalishlarda, ya’ni dast ko‘tarish mashqida, siltab ko‘tarish mashqida hamda ikkikurash natijasiga ko‘ra 1-o‘rinni egalladi – 212 (95+117) kg.
Bugungi dasturlarda avvalroq, yoshlar o‘rtasida -102 kg vazn toifasida Sharofiddin Amriddinov 3ta oltin, Qudratbek Salimjonov 2ta bronza medalni qo‘lga kiritgan edi. Bundan tashqari, o‘smirlar o‘rtasida Qudratbek Salimjonov 3ta kumush medalni o‘z nomiga yozdirib qo‘ydi.
