Baxtiyor Qosimov Qatarning «Al-Xor» jamoasi bilan 1 yillik shartnoma imzolagani haqida o‘qigandirsiz. Bu qanday amalga oshgani haqida futbolchining o‘zi ham so‘zlab berdi. Bunda quyidagi jihatlarga e’tibor qaratish lozim.

Baxtiyor legionerga «Surxon» klubidagi o‘yinlari orqali aylandi. Bu muhim faktor. Katta maqsadlar sari eng yaqin yo‘l faqatgina Toshkent bo‘lib qolishi kerak emas. Har qanday jamoa menejerlari xalqaro aloqalarni yaxshi yo‘lga qo‘ya olishi muhim. U hatto Superligada 10-o‘rinda borayotgan bo‘lsa ham.  

«Surxon» klubidagi futbolchilar statistikasiga nazar solsangiz, Baxtiyor mavsum avvalida 12 ta uchrashuv o‘tkazdi. Ya’ni, ispaniyalik mutaxassis uning xizmatlaridan yetarlicha foydalanib kelayotgandi. Shunga qaramay, «Surxon» futbolchi hayotida yangi sahifa ochilishiga qarshilik qilmadi.

Qosimov bunga qadar ikki mavsum "Andijon" sharafini himoya qildi. Ungacha "Xotira-79" safida to‘p tepdi. Agar futbolchining o‘zida nimadir bo‘lsa, u Birinchi liganing o‘zidayoq ko‘zga ko‘rinishi va kattaroq jamoaga yo‘l olishi mumkin. Mazkur jihat bugun Birinchi ligada to‘p surayotgan yoshlarga motivasiya berishi va ular ishlashdan to‘xtamasligi kerak.

«Al-Xor» Qatar quyi ligasida o‘ynaydi va Yulduzlar ligasiga qaytishga bel bog‘lagan. O‘z-o‘zidan Yulduzlar ligasida o‘ynashdan ko‘ra, quyi liga orqali jamoaning ajralmas qismiga aylanib olish osonroq. Agar shu mavsum futbolchi o‘zini har taraflama ko‘rsata olsa va «Al-Xor» ham Yulduzlar ligasiga qaytsa, katta ehtimol bilan klub shartnomani uzaytirish uchun muzokaralar stoliga qayta o‘tirishi mumkin.

Umuman olganda o‘zbekistonlik futbolchining legioner sifatida boshqa mamlakatda to‘p tepishi har taraflama foydali. «Surxon» uning pozisiyasida boshqa futbolchiga imkon beradi, futbolchining o‘zi avvalgidan yaxshiroq maoshga ega bo‘ladi, haqiqiy musofirchilik qanday ekanini ko‘radi, shaxs sifatida o‘sadi. Biz yangi jamoasi safida Baxtiyor Qosimovga ulkan muvaffaqiyat tilab qolamiz.

Diyor Imomxo‘jayev.