Superliga ikkinchi davrasi oldidan «Dinamo» jamoasi muxlislar intiqlik bilan kutgan futbolchini klubga qaytardi.
«Dinamo» PFK rahbariyati say’-harakati bilan klub Belarus chempionati yetakchilaridan biri «Energetik-BGU» bilan o‘zbekistonlik yarimhimoyachi Shohrux Abdurahmonovni yarim yillik ijaraga olish borasida kelishuvga erishdi. 23 yoshli futbolchi ham Samarqandga qaytib, jonajon jamoasiga mavsumning ikkinchi qismida yordam berishga qaror qildi. Klub va Shohrux Abdurahmonov o‘rtasida mavsum yakuniga qadar shartnoma imzolandi va u bugun, 29 iyul kunidan «Dinamo»ning Toshkentdagi yig‘iniga qo‘shildi.
2019 yil «Dinamo» safida 19 yoshida Superligada debyut qilgan Shohrux Abdurahmonov uch yil davomida jamoamiz sharafini munosib himoya qilib, 2021 yil klubning Pro ligadan elitaga qaytishiga katta hissa qo‘shib, mavsum yakunida muxlislar tomonidan «Dinamo»ning 2021 yilgi eng yaxshi o‘yinchisi» deb topilgandi. Shundan so‘ng u legioner bo‘lishga qaror qilib, «Energetik-BGU» safiga o‘tgandi.
Ma’lumot uchun, Abdurahmonov joriy mavsum «Energetik-BGU» safida Belarus chempionatida barcha 13 o‘yinda maydonga tushib, bitta gol va 4ta assistga mualliflik qilgan." - deyiladi "Dinamo" klubi rasmiy bayonotida.
