Yozgi transfer “oynasi”dan samarali tarzda foydalanib, o‘z tarkibini kuchaytirishga harakat qilayotgan «Navbahor» tarkibiga mahoratli yarim himoyachi Doniyor Abdumannopov qo‘shildi.  

Abdumannopov 2000 yil, 12 oktyabrda Andijon viloyatining Marhamat tumanida tug‘ilgan. Doniyor Abdumannopov katta futboldagi faoliyatini 2016 yili Toshkentning “Bunyodkor” jamoasida  boshlagan va poytaxtliklar tarkibida bir mavsum o‘ynagan.

2017 – 2020 yillarda esa “Andijon” (Andijon) tarkibida to‘p tepgan.  Shundan so‘ng, futbolchi faoliyatini xorijda davom ettiradi va o‘tgan mavsumni Belarusning “Energetik - BGU” (Minsk) jamoasida o‘tkazadi.

Joriy mavsumning 1-davrasida “So‘g‘diyona” (Jizzax)da o‘ynagan mahoartli yarim himoyachi Coca Cola Superliga bahslarida jizzaxliklar tarkibida 11 ta o‘yinda maydonga tushib, 4 ta golga mualliflik qilgan.

Doniyor Abdumannopov “Navbahor” matbuot xizmati o‘z taassurotlari bilan o‘rtoqlashdi.

"Meni “Navbahor”ga Samvel Babayan taklif etdi. Samvel Vyacheslavovich oldin ham meni o‘zi faoliyat yuritgan jamoalar, jumladan, “Navbahor”ga ham taklif etgandi. Ammo mazkur mutaxassis bilan birga faoliyat yuritish uchun endigina yaxshi imkoniyat tug‘ildi va bundan samarali foydalanishga harakat qilib, namanganliklar tarkibiga qo‘shildim. Jamoada meni juda yaxshi kutib olishdi.

To‘g‘ri, “So‘g‘diyona” ham yaxshi jamoa. “Navbahor” tarkibiga  qo‘shilishimga namanganliklarning joriy mavsumda o‘z oldiga yuksak  maqsadlar qo‘yganligi, jamoa o‘z nomi va tarixi, shuningdek, ajoyib ishqibozlarga ega ekanligi, “Navbahor” muxlislarining dong‘i butun O‘zbekistonga taralganligi ham muhim rol o‘ynadi.

“Lochinlar” tarkibida chiroyli o‘yinlar namoyish etib, jamoaning zafarlari, Osiyo Chempionlar Ligasi  yo‘llanmasini qo‘lga kiritishiga munosib hissamni qo‘shish niyatidaman. Xudo xohlasa, bu yil “Navbahor” o‘z oldiga qo‘ygan maqsadiga erishadi, degan umiddaman", — dedi Doniyor.

“Navbahor” PFK matbuot xizmati.