Hindistonning Chennay shahrida bo‘lib o‘tayotgan Butunjahon shaxmat olimpiadasida bugun o‘tkazilgan sakkizinchi tur o‘yinlari yakunlandi.

O‘zbekiston erkaklar terma jamoasi Germaniya ustidan qozonilgan kichik hisobdagi g‘alabadan so‘ng o‘z ochkolarini 14taga yetkazib, jadvalda 3-pog‘onaga tushdi. Hindistonning ikkinchi jamoasi qo‘shimcha ko‘rsatkichlar evaziga 2-o‘ringa ko‘tarilib oldi. Armaniston esa bugun Hindistonni 2,5 : 1,5 hisobida mag‘lub etib, o‘z peshqadamligini saqlab qoldi.

Yigitlarimiz ertaga aynan Armanistonga qarshi bahslarda ishtirok etadigan bo‘ldi. Aynan mana shu to‘qnashuv ko‘p ehtimol bilan sovrinli o‘rinlar masalasiga oydinlik kiritishi mumkin. Sportchilarimizdan jiddiy tayyorgarlik talab etiladi. Armanistonliklar turnirda 12-raqam ostida saralanishgan. Eslatib o‘tamiz, O‘zbekiston 14-raqamli jamoa hisoblanishadi.

O‘zbekiston ayollar terma jamoasi bugun Shimoliy Makedoniyani ustidan qozonilgan g‘alaba tufayli jadvalda 40-o‘ringa ko‘tarildi. Qizlarimiz 9-turda Isroilga qarshi bahslarda ishtirok etishadi. Ushbu jamoa musobaqada 19-o‘rinda saralangan bo‘lib, ayni paytda 29-pog‘onani band etib turibdi.